Derek Watts maak kankerdiagnose bekend

Derek Watts (Foto: Carte Blanche)

Die bekende Carte Blanche-aanbieder Derek Watts is verlede jaar met kanker gediagnoseer en gaan dit vir eers rustiger by die werk vat om op sy gesondheid te fokus.

Dit is Sondagaand tydens Carte Blanche bekend gemaak dat Watts verlede jaar met velkanker gediagnoseer is wat na sy longe versprei het.

Maroela Media het begin April berig dat Watts weer moes leer loop nadat hy die maand tevore inmekaargesak en in die hospitaal opgeëindig het. Die TV-persoonlikheid, wat ʼn huishoudelike naam geword het as deel van dié ondersoekende joernalistiekprogram, het aanvanklik gedink dat hy ʼn beroerte gekry het, maar die dokters het egter vasgestel dat dit ernstige sepsis was.

“Derek het enorme vertroosting gevind uit die duisende boodskappe wat hy ontvang het tydens sy herstel van sepsis,” het John Webb, uitvoerende vervaardiger van Carte Blanche, gesê. “Na aanleiding van sy kankerdiagnose weet ek dat sy vasberadenheid versterk sal word deur die volgehoue liefde en ondersteuning van die mense aan wie hy sy werklewe toegewy het. Ons wens ons patriarg, mentor, kollega en vriend sterkte en herstel toe.”

Carte Blanche het daarop gewys dat Watts deur sy merkwaardige loopbaan die lewens van verskeie mense aangeraak het, en dat sy onblusbare lewenslus ’n bron van inspirasie vir almal is.

“Alhoewel hierdie nuus ongetwyfeld ontmoedigend is, bly ons hoopvol en optimisties oor Derek se reis na herstel. Ons het volle vertroue in die kundigheid en toewyding van sy mediese span, wat die beste moontlike sorg en ondersteuning deur hierdie proses sal bied.”

Nomsa Philiso, uitvoerende hoof van vermaak by die MultiChoice-groep, het Watts sterkte toegewens. “M-Net wil graag ’n boodskap van ondersteuning en goeie wense aan die veteraan-ondersoekende joernalis en jarelange Carte Blanche-aanbieder stuur. Ons hou hom, sy familie en vriende in ons gedagtes en gebede en wens hom sterkte en moed toe terwyl hy hierdie siekte beveg. Die span by M-Net het die grootste respek en bewondering vir Derek en sy verbintenis tot die kanaal vir die afgelope 36 jaar. Derek se geweldige bydrae tot Carte Blanche vorm die tapisserie en nalatenskap van die M-Net-handelsmerk. Ons sal aanhou om hom te ondersteun gedurende hierdie uitdagende tyd.”

Watts is sedert Carte Blanche se ontstaan in 1988 deel van die program en het hy een van Suid-Afrika se mees gerespekteerde en erkende ondersoekende joernaliste geword. “Hy het ’n instrumentele rol gespeel in die onthulling van waarheid en geregtigheid vir baie. Sy onwrikbare verbintenis tot die program en sy missie om die diegene wat aan bewind is aanspreeklik te hou, is ʼn voorbeeld vir ons almal.”

Watts het almal bedank vir die volgehoue ondersteuning. “Dankie vir al die liefde, die boodskappe, die gebede wat ons almal hoop gee. En natuurlik dankie dat jy aanhou om Carte Blanche te kyk. Ek is gou weer terug.”

UPDATE ON DEREK WATTS' HEALTH@DerekWatts updates #CarteBlanche viewers on his health. Read the full statement now on our website. Papa D, the Carte Blanche family and MultiChoice team are behind you all the way. https://t.co/Tz9oeEXtdQ pic.twitter.com/KS9dI5Sqjy

— Carte Blanche (@carteblanchetv) June 11, 2023