Een sterf toe voertuig bo-op padversperring beland  

‘n Ongeluk op die N2, (Foto: Netcare911)

Paramedici van Netcare 911 het Vrydagoggend gereageer op ʼn ongeluk op die M25 onder die brug oor die N2 in Avoca, Durban.

“Inligting van die toneel dui daarop dat die bestuurder van ʼn sportnutsvoertuig beheer oor sy motor verloor en van die pad gery het,” het Shawn Herbst, woordvoerder van Netcare911 gesê.

Die voertuig, met nog twee insittendes, het teen ʼn padversperring onder die brug gebots.

Foto’s van die toneel wys hoe die voorkant van die voertuig oor die padversperring hang met die voorwiele van die voertuig in die lug.

“Paramedici op die toneel het die pasiënte behandel. Die bestuurder, ʼn volwasse man, is op die toneel dood verklaar,” het Herbst gesê.

“’n Volwasse vrou en minderjarige meisie het matige beserings opgedoen. Hulle is op die toneel behandel en na ʼn nabygeleë hospitaal geneem nadat hulle gestabiliseer is.”