EFF sal betoog wanneer Gordhan, OB hof toe gaan

Julius Malema, leier van die EFF. (Foto: Twitter via @EFFSouthAfrica)

EFF-leier Julius Malema sê die rooi barette sal Dinsdag buite die hooggeregshof in Pretoria betoog wanneer die eerste gedeelte van Pravin Gordhan, minister van openbare ondernemings, se regstryd teen die openbare beskermer (OB) aangehoor word.

“Ons gaan Jamnadas hanteer soos ʼn grondwetlike misdadiger en enige iemand wat nie daarvan hou nie, kan huis toe gaan en ʼn lekker koppie tee drink, want daar is niks wat julle daaraan kan doen nie,” het Malema by ʼn mediakonferensie in Kaapstad gesê. Jamnadas is Gordhan se tweede naam.

“Tree aan, kom ons ontmoet mekaar Dinsdag. Jamnadas het die OB hof toe gevat en ons gaan hof toe en sal nie deur enige iemand gestuit word nie. Geen hoeveelheid intimidasie kan die EFF keer nie, ons luister nie vir enigiemand nie, ons luister vir ons kiesers.”

Malema het teen die Suid-Afrikaanse Kommunistiese Party (SAKP) uitgevaar omdat hulle vroeër die dag hul steun vir Gordhan uitgespreek het. Die SAKP het gesê hy sal die nasionale vergadering aanmoedig om ʼn proses te begin om die OB, Busisiwe Mkhwebane, se bevoegdheid om haar amp te beklee, te hersien.

Alex Mashilo, SAKP‑woordvoerder, het gesê Mkhwebane se bevinding dat Gordhan toegelaat het dat ʼn geheime eenheid binne die Suid-Afrikaanse Inkomstediens (SAID) tot stand kom, was deel van ʼn veldtog om die regering se poging om korrupsie uit te roei te ondermyn.

Regter Pieter Meyer het Woensdag in die hooggeregshof beslis dat beweringe oor die bestaan van ʼn sogenaamde “geheime eenheid” ongegrond is en dat die vestiging van ʼn SAID-eenheid genaamd die hoërisiko-ondersoekeenheid wettig was.

Mashilo het gesê miljarde rande is uit regeringskoffers geplunder in die staatskapingskandaal, en tog het Mkhwebane op verdagte wyse gekies om eerder te fokus op die valse bewerings van ʼn onwettige eenheid binne die inkomstediens.

Malema het teruggekap dat die SAKP ʼn uitgediende liggaam is en dat die EFF hulle nie aan die party sal steur nie.

“Hulle het niks om vir ons te sê nie. As hulle wil kom, laat hulle kom, maar ons sal nooit stilbly nie. Ons sal nooit in ʼn hoek ingedruk word en voorgesê word wat om te sê en wat om nie te sê nie. Kom ons gaan na die strate toe en as jy ʼn geveg wil hê, gaan jy dit kry. Ons is nie bang nie. Julle soek ons, ons is Dinsdag in Pretoria.”

Mkhwebane het ʼn ondersoek na Gordhan van stapel gestuur nadat sy ʼn klagte van die EFF ontvang het oor die sogenaamde geheime eenheid in die SAID. Gordhan hou vol hy het niks verkeerd gedoen nie en het die hof versoek om die implementering van Mkhwebane se regstellende stappe op te skort hangende ʼn volledige wetlike hersiening van haar bevindings.