Die Suid-Afrikaanse Weerdiens (SAW) het Vrydag ʼn oranje vlak 6-weerwaarskuwing vir dele van Noordwes en die Vrystaat uitgereik. Dit volg omdat ontwrigtende reën Vrydag laatmiddag en Saterdag heeldag in hierdie gebiede verwag word en tot moontlike beskadiging van paaie en brûe kan lei.
Die weerdiens raai Suid-Afrikaners in hierdie gebiede aan om, waar moontlik, binnenshuis te bly en veral paaie te vermy. Voetgangers moet ook vermy om riviere en strome oor te steek indien die water tot bo hulle enkels strek. “Indien jy in jou voertuig vasgekeer word, verlaat jou voertuig en maak seker jy kom by hoër grondgebied uit,” lui die waarskuwing.
In Noordwes geld die waarskuwing vir Mahikeng, Lichtenburg, Ventersdorp, Potchefstroom en Klerksdorp. In die Vrystaat moet inwoners van Kroonstad, Welkom, Parys, Bloemfontein en Reitz asook inwoners so ver as Barkly-Wes besonder versigtig wees.
ʼn Vlak 4-waarskuwing is vir Randfontein in Gauteng en Hartbeespoort in Noordwes uitgereik, wat vir die res van Vrydag geld. “Daar sal waarskynlik erge verkeersoponthoude wees weens swak sig en oorspoeling van paaie,” waarsku die SAW.
ʼn Geel vlak 2-waarskuwing is ook vir die res van Noordwes, Gauteng en groot dele van die Noord –en Oos-Kaap uitgereik. Hiervolgens kan oorstromings in informele nedersettings, naby paaie en in laagliggende gebiede voorkom. Die weerdiens waarsku veral teen nat paaie en moeilike bestuurstoestande wat tot ongelukke kan lei.
Hierdie waarskuwings geld in meeste gevalle die res van Vrydag en die hele Saterdag.
Die stad Tshwane het ook Vrydag gewaarsku dat onwettige storting, asook plakkery op vloedvlaktes die risiko vir oorstromings vererger. Dit kan tot verlies van eiendom en selfs menselewens lei.
Ek dink veral aan inwoners van die Oos Kaap wat nog onlangs dag zero ervaar het.Weet iemand of dit al daar gereën het.
Bly by die huis