Geen beurtkrag die langnaweek  

Foto bloot ter illustrasie. (Argieffoto: Unsplash)

Beurtkrag sal tot Saterdagoggend geld voordat dit vir die res van die langnaweek opgeskort sal word.

Fase 2-beurtkrag sal van vanmiddag 16:00 tot Saterdag om 05:00 geïmplementeer word waarna beurtkrag tot Dinsdagoggend opgeskort sal word. Volgens Eskom is dit danksy volgehoue verbeterde opwekkingsbeskikbaarheid sowel as die verwagte laer aanvraag oor die langnaweek.

Fase 1-beurtkrag sal Dinsdag om 05:00 ingestel word. “Gedurende die langnaweek sal Eskom aandag gee geringe defekte aan sommige opwekkingseenhede deur beplande instandhouding te verrig,” het die kragvoorsiener gesê. “Eskom sal die kragstelsel fyn monitor en enige veranderinge aan beurtkrag kommunikeer indien dit nodig sou wees.”

Onderbrekings beloop tans 14 364 MW se opwekkingsvermoë terwyl 5 731 MW van die vermoë afgeskakel is weens beplande instandhoudingswerk.

ʼn Opwekkingseenheid elk by die Arnot- en Kendal-kragstasie is in die afgelope 24 uur uit werking gestel vir herstelwerk. Die verwagte terugkeer van ʼn opwekkingseenheid by die Kendal-kragstasie is vertraag, wat verder bydra tot die huidige kapasiteitsbeperkings. Eskom-spanne werk onverpoosd daaraan om hierdie opwekkingseenhede weer in diens te kry.

Eskom verwag kragverbruik van 27 406 MW tydens die aandspitstye en doen ʼn beroep op die publiek om voort te gaan om die vraag te verminder deur nie-noodsaaklike toestelle af te skakel.

“Ons bedank graag diegene wat wel gehoor gee aan die oproep om elektrisiteit spaarsamig en doeltreffend te gebruik, insluitend die afskakeling van geisers en swembadpompe van 17:00 tot 21:00, aangesien dit die vraag verlaag en help om die druk op die kragstelsel te verlig en bydra tot laer fases van beurtkrag.”