Geweld by Brackenfell-skool veroordeel

Inwoners van Brackenfell in Kaapstad en betogers van die EFF raak slaags buite die Hoërskool Brackenfell. (Foto: ANA)

Die LUR vir onderwys in die Wes-Kaap, Debbie Schäfer, het Maandagoggend se geweld by die Hoërskool Brackenfell ten sterkste veroordeel.

ʼn Storm het losgebars nadat beweer is dat ʼn private matriekafskeidsgeleentheid plaasgevind het en geen swart leerder van die skool glo genooi is nie.

Die EFF het weens die beweerde rassisme vir die derde keer die afgelope week na die skool opgeruk waar hulle teen die beweerde rassisme betoog het. Hier het hulle hul egter teen ʼn linie ouers en inwoners vasgeloop en emosies het gou oorgekook.

“Ek veroordeel die optrede van die EFF-lede en die ouers buite die skool, wat geweld gebruik het om hul griewe te lug, ten sterkste,” het Schäfer gesê.

“Gewelddadige aanvalle is bloot onaanvaarbaar en gaan ons leerders op geen manier baat nie. Geweld is nie ʼn oplossing vir geskille nie. Ek doen ʼn beroep op alle partye om op ʼn volwasse en verantwoordelike manier te beraadslaag en op die polisie om te verseker dat ons leerders teen hierdie soort geweld beskerm word.”

Minstens een persoon is op aanklag van openbare geweld aangekeer. (Foto: ANA)

Schäfer sê leerders skryf tans onder uiters moeilike omstandighede die gr. 12-eindeksamen en die EFF weet baie goed dat dié soort konfrontasie onderrig sal ontwrig en onnodige spanning vir leerders sal veroorsaak.

Die WKOD het die oproer veroordeel en sê dit plaas onnodige druk op leerders. (Foto: ANA)

“Om hierdie soort konflik doelbewus uit te lok, wys duidelik dat die EFF nie bekommerd is oor die welstand van leerders nie. Dit is net nog ʼn poging deur hulle om verdere verdeeldheid met populistiese manewales te veroorsaak.”

Schäfer sê ongeag wat mense se gevoel oor die funksie is, was dit steeds ʼn geselligheid wat deur private individue op hul eie by ʼn private venue gehou is. Die skool het niks met die organisering daarvan te doen gehad nie.

“Dit is nie op enige manier deur die skool gesteun, gefinansier of goedgekeur nie. Weens kommer oor Covid-19 het die skool nie vanjaar ʼn matriekbal gehou nie.

“Die Wes-Kaapse onderwysdepartement kan en gaan ook nie enige stappe doen teen onderwysers wat as gaste genooi en ʼn private geleentheid bygewoon het wat hulle nie gereël het nie en terwyl hulle ook nie vooraf geweet het wie dit gaan bywoon nie,” het Schäfer gesê.

Sy het gesê dit is ook nie vir die departement om voor te skryf wie na funksies buite die skoolterrein genooi word nie.

Susan Potgieter, ʼn adjunkhoof van die skool, wou geen kommentaar lewer nie en het alle navrae na die onderwysdepartement verwys.

Minstens een persoon is in hegtenis geneem ná vanoggend se oproer.

Mense raak slaags buite die Hoërskool Brackenfell in Kaapstad. (Foto: ANA)

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

36 Kommentare

jongste oudste gewildste
Trotse Boervrou

Beste Debbie

Gaan vra asb vir die staatspresident en die minister van polisie waarom die EFF nog los rondloop daar buite. Dit help nie jy vra die EFF nie. Hulle weet self nie hoekom nie aangesien hulle net puppets is.

Groete

H

Hoe kan ons malema laat opsluit ???? Ek is bereid om n klag nou te gaan le !! Waar is die hoog geleerdes ??

Buks

N oorlog begin met ‘n paar klein veldslae hier en daar. Passop Suid-Afrika dis nog net die begin. Die wit Burgers van hierdie land is al lank bedreig en gedreig. Die tyd van mooi praat raak min. Mense raak keelvol vir die arrogante rooi bende.

Willem

Veroordeel die EFF. Hul het niks daar te doen nie en seker nie een van hulle het kind daar op skool

Pieter

Well done!!!