Herbou van parlement sloer

(Foto: Stad Kaapstad)

Sedert die parlement 18 maande gelede in ʼn verwoestende brand beskadig is, is daar nog weinig vordering gemaak met die herbou van dié nasionale baken.

Groot skade is onder meer aan die Ou Raadsaal en die gebou wat die Nasionale Vergadering huisves aangerig toe daar op 2 en 3 Januarie verlede jaar ’n groot brand by die parlementêre kompleks in Kaapstad uitgebreek het. Verskeie vergadersale, komiteevertrekke en byna 500 kantore is verwoes.

Siviwe Gwarube, DA-hoofsweep, sê hulle eis nou antwoorde van Nosiviwe Mapisa-Nqakula, die speaker van die Nasionale Vergadering, en die voorsitter van die gesamentlike staande komitee oor die finansiële bestuur van die parlement (JSCFMP) oor die vordering van die herbouprojek.

“Volgens die parlement se eie tydlyn moes die grootste deel van die opruimingswerk van die puin en rommel van die afgebrande gebou reeds Maandag afgehandel wees,” sê Gwarube.

“Dit is duidelik nie die geval nie; dit is reeds ʼn jaar en ʼn half sedert die parlementêre kompleks afgebrand het en daar is nog geen werk aan die afgebrande geboue gedoen nie.

“Dit veroorsaak dat kritieke dele van die instelling onbruikbaar is; nie net vir parlementslede nie, maar ook vir lede van die publiek.

“Openbare toegang tot die parlement is ʼn reg wat in die Grondwet vervat word en dit is die sleutelpunt van die werk wat ons as openbare verteenwoordigers doen.”

Volgens Gwarube het die parlement in Mei vanjaar die laaste verslag oor die projekmylpale gelewer.

“Om die herbouprojek in twee jaar af te handel – soos beplan is – moes die herbou van die kantore vir LP’s teen Junie voltooi wees en die verwydering van die puin en rommel van die afgebrande geboue teen Maandag 31 Julie klaar wees.

“Dit is eenvoudig nie gedoen nie. Die kantore word steeds gebou en geen pogings om die puin en rommel te verwyder, is al aangewend nie.”

Mapisa-Nqakula en Amos Masondo, voorsitter van die Nasionale Raad van Provinsies (NRP), moet dringend ʼn statusopdatering oor die herbouprojek van die parlement verskaf, sê Gwarube.

“Dit is duidelik dat die spertye wat die parlement vir homself en die implementeringsagent, die Ontwikkelingsbank van Suider-Afrika, gestel het, nie nagekom is nie.

“Nou wil ons weet ​​wanneer die werk gedoen sal word en hoe dit die begroting – wat aanvanklik toegeken is – asook die tydsduur van die projek gaan beïnvloed.

“Die herbouprojek is van groot openbare belang en daar is ʼn behoefte aan doeltreffende openbare verteenwoordiging deur lede van die parlement. As daar vertragings is, het ons deursigtigheid nodig.

“Die speaker van die Nasionale Vergadering en die voorsitter van die NRP moet saam met die parlementêre sekretaris rekenskap gee van die vertragings en duidelikheid verskaf oor die status van die projek,” sê Gwarube.