Hernude oproepe vir ondersoek na parlementêre sekretaris se salaris

Nosiviwe Mapisa-Nqakula. (AFP).

Die DA het ʼn mosie ingedien vir ʼn amptelike ondersoek na die salaris van Xolile George, parlementêre sekretaris.

Siviwe Gwarube, DA-LP en hoofsweep van die party, sê dié mosie kom nadat die voorsitters van die komitee die saak vertraag het en dit in wese onder die mat probeer invee het.

George se salaris is luidens berigte kort ná sy aanstelling met bykans 70% opgestoot; van R2,6 miljoen tot R4,4 miljoen.

Nosiviwe Mapisa-Nqakula, destydse speaker van die nasionale vergadering, is onder verdenking vir haar betrokkenheid by dié beweerde onregmatige verhoging. Die speaker en nasionale raad van provinsies se voorsitter (destyds Nkosiyakhe Masondo) vorm die uitvoerende gesag.

George se vergoedingspakket is glo deur hulle, as uitvoerende gesag, verhoog.

Gwarube sê die DA het die parlement se gesamentlike staande komitee oor finansiële bestuur genader om die saak te ondersoek, maar nadat die voorsittende beamptes die kwessie “uitgerek en uiteindelik onder die mat ingevee het”, is die staande komitee genader.

Sy sê ondanks ʼn senior advokaat wat deur die parlement aangestel is en wat bevestig het dat Mapisa-Nqakula en Masondo verantwoording moet doen, het hulle die regsadvies geïgnoreer en ná Mapisa-Nquakula se bedanking besluit om nie die saak verder te voer nie.

DA-hoofsweep Siviwe Gwarube (Foto: Siviwe Gwarube/Facebook)

Die DA het ʼn klagte by die komitee oor magte en voorregte ingedien om die beweerde aandadigheid van Mapisa-Nqakula te ondersoek, en ’n soortgelyke klagte by die nasionale raad van provinsies (NRP) om Masondo te ondersoek.

Die DA vra vir die samestelling van ʼn ad hoc-komitee om die kwessie deeglik te ondersoek.

Gwarube sê die feite oor die salarisverhoging is vaag en vrae bly onbeantwoord.

“Hoekom word [George] ʼn salaris toegeken wat 70% hoër is as wat op die webwerf geadverteer is en wat is in die parlement voorgelê? Watter regstellende stappe bly oor? Wie moet verantwoordelik gehou word vir die misleiding van die parlement?”, vra sy.

George, wie se salarisaanpassing destyds stil-stil gedoen is, het ʼn stadium ʼn groter salaris as pres. Cyril Ramaphosa verdien.

“Die DA sal nie rus totdat hierdie vrae beantwoord is nie. Die adjunkspeaker en voorsitter van die NRP kan besluit om die komitee saam te stel en te verseker hy dien die verslag in voor die parlementêre termyn op 21 Mei verstryk.”