‘Hersien wetgewing oor lisensies’

(Foto: RTMC)

AfriForum gaan die vereiste dat bestuurslisensiekaarte elke vyf jaar hernu moet word, in die hof betwis. Die burgerregteorganisasie versoek dat dié vereiste ongeldig verklaar en hersien word aangesien die wetgewing rakende die hernuwing van bestuurslisensies, onduidelik is.

“AfriForum eis ’n verklarende bevel dat die Nasionale Padverkeerswet en die meegaande regulasies, in soverre dit die hernuwingstydperk vir bestuurderslisensiekaarte tot vyf jaar beperk, ultra vires, onredelik, arbitrêr en vaag is.

“Die organisasie eis verder ’n verklarende bevel dat motoriste nie kragtens dié wetgewing gepenaliseer of beboet mag word omdat hulle nie in besit is van ’n hernude bestuurderslisensiekaart is nie, aangesien so ’n boete nie bestaan nie,” het Reiner Duvenage, AfriForum se veldtogbeampte vir strategie en inhoud, Donderdag tydens ’n regstreekse uitsending gesê.

AfriForum voer aan dat sy aansoek op grond van aansienlike regs- en praktiese gronde behoort te slaag aangesien die Nasionale Padverkeerswet en -regulasies uit ’n regsperspektief te vaag is om uitvoerbaar te wees.

“Die wetgewing onderskei nie duidelik tussen ’n ‘bestuurslisensie’ en ’n ‘bestuurslisensiekaart’ nie. Dit bepaal ook nie uitdruklik dat motoriste om ’n nuwe kaart moet aansoek doen wanneer dié kaart verval nie. Dit bepaal nie eens dat dit ’n misdaad is om met ’n vervalde lisensiekaart te bestuur nie en skryf geen boete, straf of sanksies voor nie.”

Duvenage sê die wetgewing is nie duidelik, bondig en intern harmonieus genoeg nie en dat die algemene publiek dus nie met sekerheid kan weet wat van hulle verwag word nie.

“Verder is die wetgewing ultra vires, met ander woorde die regering kan nie lede van die publiek straf as dit nie duidelik kan aantoon watter wet oortree is nie. Enige so ’n straf kom neer op ’n skending van regte.

“Uit ’n praktiese oogpunt maak die departement van vervoer se goed gedokumenteerde administratiewe, operasionele en finansiële stryd dit onuitvoerbaar, onredelik en irrasioneel om van bestuurders te vereis om hul lisensiekaarte elke vyf jaar te hernu.”

Die aansoek beklemtoon verder dat baie lande wêreldwyd ’n lisensiekaartstelsel kies wat nie so ’n gereelde hernuwing vereis nie.

“Dit is verregaande dat die vereiste om bestuurderslisensiekaarte elke vyf jaar te hernu skynbaar op geen wetgewing berus nie. As ons aansoek suksesvol is, sal dit die departement van vervoer lelik in die skande steek, aangesien dit sal beteken dat hulle die publiek al jare lank onregmatig straf.

“Dit kan werklik ’n keerpunt in die geskiedenis van Suid-Afrika wees.”

AfriForum het ’n webwerf bekendgestel waar lede van die publiek die hofsaak kan ondersteun.