Hoë in OB-kantoor had nie sekerheidsklaring

Vussy Mahlangu (Foto: Skermgreep)

Die voormalige uitvoerende hoof van die Openbare Beskermer (OB) se kantoor het nie die nodige veiligheidsklaring gehad nie, al was dit ’n vereiste vir die pos wat hy beklee het.

Vussy Mahlangu het Dinsdag voor die parlement se artikel 194-komitee verskyn wat belas is met die proses oor die moontlike verwydering van Busisiwe Mkhwebane as OB.

Die komitee het gehoor dat Mahlangu talle dissiplinêre sake verdedig het wat plaasgevind het sedert hy as uitvoerende hoof van die OB gedien het. Hy het bewerings ontken dat hy werknemers in die OB se kantoor geteister, geviktimiseer en geïntimideer het. Hy het gesê al die korrekte prosedures is gevolg en het ook ontken dat die toename in dissiplinêre aangeleenthede in die kantoor van die OB ’n aanduiding is van die verwydering van senior amptenare.

Rakende sy veiligheidsklaring het Mahlangu gesê die Staatsveiligheidsagentskap het aangedui dat hy nie dié klaring kon kry nie nadat hy by sy vorige pos by die departement van landelike ontwikkeling en grondhervorming weg is weens aanklagte teen hom. Dié saak is steeds hangende in die arbeidshof.

Mahlangu het egter ontken dat hy sy mag misbruik het in die kantoor van die OB, al is hy ook in sy vorige pos daarvan beskuldig.

Volgens Mahlangu het in sy 19 maande ampstermyn in die kantoor van die OB, op feite staatgemaak wanneer dissiplinêre verhore en ondersoeke plaasgevind het. Hy het ontken dat die dissiplinêre optrede wat hy onderneem het in opdrag van of in oorleg met Mkhwebane was aangesien hy in beheer was van die administrasie en dat Mkhwebane nie ingemeng het nie. Mahlangu het in Januarie 2020 uit die pos bedank.

Mahlangu wou nie die redes vir sy bedanking bekend maak nie en het nadat hy daaroor uitgevra is, gesê dit is persoonlik. Hy het aangevoer Mkhwebane het die kantoor van die OB bekend en toeganklik vir die publiek gemaak deur die hofsake wat sy hanteer het. Hy wou egter nie kommentaar lewer oor of Mkhwebane die regte prosedures gevolg het in haar ondersoeke nie. Mkhwebane was ’n harde werker en hy het baie by haar geleer, het Mahlangu aangevoer.

Qududile Dyantyi, komiteevoorsitter, het Mahlangu gevra om sy vroeëre getuienis te bevestig dat hy niks met die ondersoeke deur die OB se kantoor te doen gehad het nie en ook nie enige navrae oor ondersoeke gedoen het nie. Mahlangu het gesê sy werk het die administrasie van die kantoor van die OB behels.

Adv. Ncumisa Mayosi, een van die getuienisleiers, het egter gesê daar is ’n e-pos waarin Mahlangu navraag gedoen het oor ’n ondersoek en dat daar ook e-posse is wat aandui dat Mkhwebane navraag gedoen het en by dissiplinêre sake betrokke was, al het Mahlangu vroeër die OB se betrokkenheid by dissiplinêre aangeleenthede ontken.

Die komitee gaan vandag met sy verrigtinge voort.