(Foto: Netcare 911)
Honderde boodskappe van medelye stroom steeds in ná ʼn helikopterongeluk Donderdag wat die lewe van vyf mense geëis en die mediese gemeenskap geruk het. Ander nooddienste, mediese organisasies, kollegas en gewone burgers het huldeblyke aan die slagoffers gebring.
Al vyf insittendes van die helikopter, die vlieënier en vier medici van Netcare en Netcare 911, het gesterf toe die helikopter in KwaZulu-Natal neergestort het.
Netcare het intussen die name van die slagoffers bekend gemaak.
Hulle is dr. Kgopotso Rudolph Mononyane, ʼn narkotiseur, dr. Curnick Siyabonga (Sia) Mahlangu, ʼn kardiotorakale chirurg, en Mpho Xaba, ʼn spesialiasteaterverpleegster. Al drie was verbonde aan die Netcare Milpark-hospitaal.
Die ongeluk het ook die lewe geëis van Sinjin Joshua Farrance, ʼn gevorderde lewensondersteuningsparamedikus by Netcare 911, en dié van die vlieënier, Mark Stoxreiter. Stoxreiter was verbonde aan die National Airways Corporation.
Dr. Richard Friedland, uitvoerende hoof van Netcare, het gesê die spesialis-intensiewesorgspan was van die Milpark-hospitaal in Johannesburg na Hillcrest in KwaZulu-Natal onderweg om ʼn uiters siek pasiënt na Johannesburg oor te plaas.
Gisteraand het kollegas by die Milpark-hospitaal byeengekom om hulde aan die vyf te bring.
(Skermgreep: Netcare Limited/Facebook)
“Ons is stom van skok oor die tragiese verlies van hierdie gesondheidshelde. Netcare word stil terwyl ons ons hoofde buig in eerbetoon, respek, liefde en herinnering aan ons oorlede kollegas en helde op die voorste linie wat in die uitvoering van hul pligte gesterf het,” het Friedland gesê.
Friedland, Craig Grindell, besturende direkteur van Netcare 911, asook verskeie ander uitvoerende hoofde van Netcare en Netcare 911 het reeds die ongelukstoneel besoek.
Die burgerlugvaartowerheid het ook reeds met sy ondersoek na die voorval begin.
HUNDREDS OF EMS PERSONNEL PAID THEIR RESPECTS & A FLY PAST IN HONOUR OF THE FALLEN HEROS WHO LOST THEIR LIVES IN THE CHOPPER CRASH IN KZN : MILPARK HOSPITAL. COJ. GP. RIP HERO'S????. MAY GOD REST YOUR SOULS.????. @Netcare911_sa @cci_network pic.twitter.com/s8APOkxSkE
— REZA (@crimeairnetwork) January 21, 2021
Ai dit is verskriklik hartseer, my innige simpatie uit my hart, aan hulle geliefdes. Dis eintlik vir die hele land n massiewe verlies, Suid Afrika het kwaliteit mense soos die oorledenes, so baie nodig.
Dis so ‘n groot verlies.
Opregte meegevoel aan alle familie, vriende en kollegas.
Ons het soveel onverstaanbare vrae wat nie hier beantwoord kan word nie.
R I V
Dit is ‘n ‘n baie duur tragedie aan hoe bydraende kaliber lede van die samelewing.
Sterkte aan die familie
sterkte aan die geliefdes
Dit is baie hartseer!