‘‘Isidingo’ word misbruik om anti-wit rassisme te bevorder’

Isidingo-skermskoot

‘n Skermskoot uit die episode van Isidingo. Foto: Youtube.com

Die burgerregte-organisasie AfriForum het Dinsdag sy kommer uitgespreek oor die openbare reaksie wat gevolg het op ʼn onlangse episode van Isidingo op SABC3 waarin wit-op-swart rassisme uitgebeeld is.

Verskeie kommentators het dié betrokke episode van die sepie as ʼn “weerspieëling van die werklikheid in Suid-Afrika” beskryf. In die episode wat Woensdagaand voor Vryheidsdag uitgesaai is, word die karakter Sechaba Moloi-Matabane, gespeel deur Motlatsi Mafatshe, deur twee wit boere aangeval terwyl hy sy pa se graf op ʼn plaas besoek. Hy word deur die twee mans aangerand en met bobbejaangeluide geterg, waarna hulle hom lewend begrawe.

Die toneel het sedertdien ʼn verskeidenheid van emosies onder Suid-Afrikaners ontlok. Isidingo is onder meer op sosiale media geloof vir die politieke standpunt wat dié program teen wit mense inneem. Ander kykers het weer hul skok en kommer oor die betrokke toneel op Isidingo se Facebook-blad uitgespreek.

Margaret Rueger het op dié blad geskryf sy dink nie dit is ʼn geskikte storielyn vir Suid-Afrika nie, behalwe as die sepie ook ʼn episode vertoon waarin plaasmoorde gewys word. “Isidingo is besig om rassisties te raak,” het Kumeren Govender geskryf terwyl Andile Mayisela gevra het waarom wit mense so “bang is om oor rassisme te praat?” Hy was een van die vele Facebook-deelnemers wat aangevoer het die episode wys net wat werklik in Suid-Afrika gebeur. Nash Black het gesê dit is ʼn uitstekende storielyn en gesê party mense is “allergies vir die werklikheid”.

Volgens Ernst Roets, adjunk uitvoerende hoof van AfriForum, weerspieël die verhaallyn in Isidingo nie die werklikheid onder wit mense, Afrikaners of boere nie. Roets meen die sepie word gebruik om ’n anti-wit rassisme te bevorder.

“Ons erken die vervaardigers van Isidingo se reg op artistieke vryheid en kan nie aan hulle voorskryf wat in die program gebeeldsend moet word nie. Ons is egter bekommerd oor die openbare reaksie wat vanuit sekere geledere op dié episode gevolg het,” het Roets gesê. Hy het aangevoer die vervaardigers van Isidingo behoort in die openbaar sterk standpunt teen alle vorme van rassisme in te neem. Roets het ook gesê dat AfriForum sal voortgaan om alle vorme van rassisme konsekwent te verwerp.

Eusebius Mackaiser, aanbieder van 702 Talk Radio, het die betrokke episode saam met Thandi Smith, hoof van Media Monitoring Africa se mediabeleidprogramme, en Carol Motlala, menseregteprokureur en lid van die persraad, ontleed. Hulle was dit eens dat die toneel ontstellend was en ʼn sensitiewe onderwerp aanraak. Motlala het aangevoer dat die episode die beginpunt vir ʼn gesprek in die huis oor rassistiese insidente kan wees. Smith het egter gesê die vervaardigers van die sepie was heeltemal binne hulle regte om gewelddadige aksies in die sepie se storielyn in te skryf, maar Motlala het aangevoer dat die vervaardigers kykers vooraf kon waarsku van die aard van die inhoud van die betrokke episode voordat hulle daaraan blootgestel is.

Kaizer Kganyago, SAUK-woordvoerder, het gesê hy kan nie tans kommentaar oor die betrokke episode lewer nie aangesien klagtes oor die episode by die Uitsaaiklagtekommissie van Suid-Afrika (UKKSA) gelê is. “Die ondersoekproses moet nou sy gang gaan en my persoonlike standpunt oor die episode is irrelevant,” het Kganyago gesê.

Shouneez Martin, registrateur van UKKSA, het bevestig dat die kommissie verskeie klagtes oor die betrokke episode ontvang het en besig is om dit verder met die SAUK op te volg.

Isidingo was vroeër die maand ook in die nuus toe daar aangevoer is die openbare uitsaaier is so erg wanbestuur dat sommige gewilde sepies se vervaardigers, soos dié van Isidingo en Muvhango, nie in April betaal sal kan word nie.

Die webwerf Channel24 het ook verlede maand berig dat Isidingo verskeie pogings gaan aanwend om te vernuwe nadat die sepie die laaste paar jaar berug geword het daarvoor dat dit konstant van skrywers en vervaardigers verander en kykergetalle bly daal het. Isidingo, wat sedert 1998 deel van die SABC3-stal is, kan tans daarin slaag om net sowat ʼn miljoen kykers lok. Dié prestasie vertoon swak in vergelyking met mededingende sepies op e.tv, het dié webwerf berig.

Volgens Endemol Shine Africa, die vervaardigers van Isidingo, poog hulle om die sepie “terug te neem na die gedrewenheid en vasberadenheid wat die essensie van Isidingo is. Die sepie moet verteenwoordigend wees van die nuwe SABC3-handelsmerk terwyl dit steeds sy opwindende en boeiende storielyne handhaaf, van die eerste minuut van elke episode,” het Pumla Hopa, uitvoerende vervaardiger van Isidingo aan die webwerf gesê.

Hier is ʼn YouTube-video van die betrokke episode van Isindingo. Die toneel waar die karakter Sechaba aangeval word begin by 08:18. Wees gewaarsku: Die tonele kan sensitiewe kykers ontstel.

https://youtu.be/jHvH6FfvRdw

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

55 Kommentare

jongste oudste gewildste
Boos

Maak mens kwaad…. nou dan moet hulle die wrede verkragting, marteling en moorde van die boere ook in die storielyn inbring…. dan wil ek hoor wat word gesê!

Valerie

Die SAUK is besig met ‘n hele tas vol agendas. 7de Laan, Isidingo, Real Talk With Anele, en so aan. Wel, die SAUK is duidelik onder ANC beheer; luister maar na die ANC-beheerde RSG met hul tasse vol agendas en propagandas. Hulle probeer dit tog so saggies inrol en dink niemand hoor dit nie. O.
Beste teenmiddel? Luister Internet radio. Daar is duisende om van te kies. Of luister na die musiek op jou foon, ens, waarvan jy hou.
Die 90% plaaslike nonsens het duidelik met ander instruksies ook gekom: agendas.

Johann Marx

Dit wil voorkom asof die vervaardigers van Isidingo nou die taak op hulleself geneem het om die “werklikheid in Suid Afrika” in hulle programme uit te saai. Nou sit ek en wag vir ‘n toneel waar ‘n swak opgeleide metropolisie-lid ‘n blanke motorbestuurder aftrek en hardhandig dreig, ek wag vir ‘n toneel waar ‘n groep swart kriminele met outomatiese gewere ‘n geldwa skaak en die insittendes vermoor, ek wag vir ‘n toneel waar ‘n twee vrouens wat saam met hulle mans om ‘n meer stap, deur ‘n bende gegryp, verkrag en hulle mans in die dam verdrink word, ek wag… Lees meer »

Willem de Klerk

Om tv lisensie te betaal vir dit wat mens kry, ingesluit Dstv, is geldmors. Ek oorweeg om geheel en al oor te skakel na internet vir tv en vermaak. Dan betaal ek nie meer tv lisensie nie. Dis buitendien ‘n propaganda masjien vir die huidige regime.

Wanda

Dis in elk geval n klomp gemors. Hulle wil ons so graag in mekaar se kele afdruk. Dis hoekom ek geen sabc kanale kyk nie.