John Block. Foto: SABC
John Block (55), voormalige ANC-leier in die Noord-Kaap en LUR vir finansies, ekonomiese ontwikkeling en toerisme, het Maandag in die Kimberley-distrikshof verskyn waar hy formeel om borgtog aansoek gedoen het.
Maroela Media het vroeër berig Block dien tans 15 jaar tronkstraf in die Upington-gevangenis vir korrupsie uit.
Die aangeleentheid hou verband met ʼn saak van 2003, waar Babereki Consulting Engineers Beperk op ʼn bedrieglike wyse ʼn tender as strukturele en siviele ingenieurs, sowel as projekbestuurder, in die geestesgesondheidshospitaalkonstruksieprojek toegeken is, sê Mojalefa Senokoatsane, woordvoerder van die Nasionale Vervolgingsgesag (NVG) in die Noord-Kaap.
“ʼn Tender ten bedrae van R51 miljoen vir struktuur- en ingenieursdienste is aan Babereki Consulting Engineers Beperk toegeken, hoewel hulle nie aan die spesifieke vereistes voldoen het nie,” bevestig Senokoatsane.
Die beskuldigde is borgtog van R50 000 in die aangeleentheid toegestaan en die staat het “in die belang van geregtigheid” nie die borgtog teengestaan nie.
“Die beskuldigde bly in aanhouding, waar hy tans sy 15 jaar direkte gevangenisstraf by Upington-gevangenis op aanklagte van korrupsie en geldwassery uitdien.”
Block sal na verwagting weer Dinsdag saam met sy medebeskuldigdes, Patience Mercia Nokhwezi Mokhali en Tshegolekae Motaung, in die Kimberley-distrikshof verskyn.
Sjoe, al wat ek uit die berig gekry het is dat “geestesgesondheidshospitaalkonstruksieprojek” een ongelooflike lang woord is in die Afrikaanse taal. Wonder wat is die langste woord in Afrikaans
Wow dis lank, gaan hom nie onthou nie
Ek is nou dom. Borgtog toegestaan. Gaan hy nou vrygelaat word uit die tronk?
Hy is reeds in die tronk en daar is nog steeds uitstaande sake teen hom, hoop tronkstraf word verleng.
Gaan my verstand te bowe hoe iemand wat 15 jaar tronkstraf uitdien en steeds in die tronk is kan aansoek doen vir borgskap ….iewers is daar groot fout met ons regstelsels…howe ens
Seker uitgenooi vir ‘n rondte Golf saam met Schabir
Wat van die ander kaders wat korrupsie pleeg, gaan hulle nie tronk toe nie ?
Drues dit maak nie sin nie.Hy dien reeds gevangenisstraf van 15 jaar uit.Maar hy is dan in die tronk.Waarvoor is hy nou aangekla.Hy kan nie nou borg kry nie
Hy het waarskynlik appél aangeteken teen sy vonnis en doen aansoek vir borg hangend sy appél.
As borg aan hom toegestaan is hoekom bly hy in aanbidding.
Hy kwalifiseer darem nou as ‘n LP !
Gelukkig het ons n PUIK regstelsel wat nie sal toelaat dat ENIGE kriminele vry rondloop nie.
Skerp!