Joost van der Westhuizen oorlede

Joost van der Westhuizen. Argieffoto: Twitter

Joost van der Westhuizen. Argieffoto: Twitter

Die Springboklegende, Joost van der Westhuizen, is Maandag in die ouderdom van 45 oorlede.

Van der Westhuizen is Saterdagoggend in ʼn kritieke toestand in die waakeenheid van die Fourways Life-hospitaal in Johannesburg opgeneem.

Van der Westhuizen is in 2011 met amiotrofiese laterale sklerose (ALS), ʼn aggressiewe vorm van motorneuronsiekte, gediagnoseer. Dokters het gesê die voormalige skrumskakel het tussen twee en vyf jaar om te leef. Sy gesondheid het kort na sy diagnose begin agteruitgaan. Hy was in ʼn rolstoel en sy spraak is ook erg aangetas.

Van der Westhuizen was een van Suid-Afrikaanse rugby se heel grotes. Hy was deel van die Wêreldbeker-wenspan in 1995 en wêreldbekerkaptein in 1999. Hy was tot in 2013 die grootste driedrukker in Springboktoetse, met 38 drieë en ʼn legende vir die Blou Bulle en Bulls in die elf jaar wat hy vir hulle gespeel het.

Hy was ook lid van die Bokke wat die Drienasiestitel in 1998 gewen het, asook lid van die Blou Bulle wat twee Curriebekers gewen het. Van der Westhuizen het ook in drie wêreldbekers, in 1995, 1999 en 2003, gespeel. Sy 89 toetse was, toe hy in 2003 uit toetsrugby getree het, ʼn rekord vir ʼn Suid-Afrikaanse speler. Hy het 144 keer vir die Blou Bulle (22 as kaptein) en 26 keer vir die Bulls uitgedraf.

Joost van der Westhuizen en Amor Vittone by hul kinders, Jordan en Kylie op Kersdag 2016. Foto: Amor Vittone, Facebook

Joost van der Westhuizen en Amor Vittone by hul kinders, Jordan en Kylie op Kersdag 2016. Foto: Amor Vittone, Facebook

Van der Westhuizen was ʼn rugbyheld en die land se liefling. Hy is in Desember 2002 met die sanger, aktrise en TV-aanbieder, Amor Vittone, getroud. Van der Westhuizen was voor Vittone met Marlene (nou Duvenage) getroud. Hulle was ses jaar getroud en is kort voor sy huwelik met Vittone geskei.

Vittone en Van der Westhuizen was een van die land se voorste glanspaartjies en vir die publiek het dit gelyk soos ʼn sprokieshuwelik. Van der Westhuizen en Vittone is egter uit mekaar nadat ʼn video aan die lig gekom het wat wys hoe hy seksuele dade uitvoer met ʼn vrou. Hy het later gebieg dit is wel hy in die video. Van der Westhuizen is kort hierna deur SuperSport as rugbykommentator gepos.

Van der Westhuizen het in 2003 uitgetree. Hy was rugbykommentator en ʼn sportheld soos net ʼn voorste Springbokrugbyspeler in Suid-Afrika kan wees. ʼn Boek oor sy lewe, Spieëlbeeld, het sy verhaal vertel. Hy het ook tydens sy speeljare ʼn BCom-graad aan die Universiteit van Pretoria behaal.

Van der Westhuizen is in 2007 ingehuldig by World Rugby se Internasionale Rugbyroemsaal. Hy is ook in 2015 ingehuldig by die Suid-Afrikaanse Heldesaal vir Sport (SASHoF).

Van der Westhuizen is op 20 Februarie 1971 gebore.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

267 Kommentare

jongste oudste gewildste
janneman

RIV ou grote, en simpatie aan die familie.

Jack Russl

RIV. Sterkte aan die familie

Linda

RIV :-(

Ada

Jammer om te hoor. Sterkte aan almal betrokke.

CAV

RIV, sterkte aan die gesin