Kommer oor water in Vredefort

(Foto verskaf deur die DA)

Die gemeenskap in Vredefort in die Vrystaat is waningelig oor die veiligheid van hul kraanwater.

Dit is onthul tydens ʼn oorsigtelike besoek deur die Demokratiese Alliansie aan die Ngwathe- plaaslike munisipaliteit om kommer oor die plaaslike watertoevoer te ondersoek.

“Ons het ontdek dat die water bloot vir pH-vlakke en stabiliteit getoets word, en nie vir bakterieë in die water nie,” sê Mariette Pittaway, die DA se provinsiale woordvoerder oor gesondheid. “Hierdie gebrek aan behoorlike toetse hou ʼn beduidende besoedelingsrisiko in vir die gemeenskap en kan lei tot die verspreiding van siektes soos cholera.”

Die DA het ook bevind dat die rioolstelsel in die dorp in die strate uitspoel en ʼn bedreiging vorm vir openbare gesondheid.

“Ná inligting van die publiek ontvang is, het ons bevestig dat die watertenkwaens by die biblioteek se boorgat opgevul word, waar kragonderbrekings gereeld voorkom. Die tenkwaens moet dus lank staan en wag om volgemaak te word.”

Daar is ook ʼn gevaarlike situasie naby ʼn boorgat waar blootgestelde bedrading en ʼn niefunksionerende toilet-uitlaat naby aan ʼn waterbron is. “Daar word beweer dat dié gebroke infrastruktuur kan bydra tot die besoedeling van die water.”

As gevolg van die dringendheid van die situasie, het die DA met die burgerregteorganisasie AfriForum kontak gemaak, wat op sy beurt met spesialiste koördineer, en hulle versoek om ʼn omvattende ondersoek te doen en dit as ʼn moontlike besoedelingsbron te toets.

“Die DA sal ook vrae aan die departement van gesondheid, die departement van samewerkende regering en tradisionele sake en die nasionale departement van water en sanitasie rig om duidelikheid te kry oor die watertenkwaens se vermoë om water uit enige bron te onttrek – insluitend die Vaalrivier.”

Pittaway sê die gesondheid en welstand van die gemeenskap is op die spel en dringende stappe moet gedoen word om die tekortkomings in waterbehandeling reg te stel en besoedelingsrisiko’s te takel. “Die DA bly daartoe verbind om die betrokke owerhede aanspreeklik te hou en seker te maak dat veilige en skoon water aan die inwoners van Vredefort verskaf word.”