Krieketbase moet dalk kniebuig-besluit aan MRK verduidelik

(Foto: @OfficialCSA/Twitter)

Solidariteit het Dinsdag sy regspan opdrag gegee om ’n dringende klag aan die Menseregtekommissie (MRK) voor te berei nadat Krieket Suid-Afrika (KSA) Dinsdag aangekondig het dat daar van elke speler verwag sal word om die knie vóór die aanvang van die oorblywende Wêreldbeker-wedstryde te buig.

KSA het besluit dat die span ’n verenigde standpunt teen rassisme moet inneem, veral gegewe Suid-Afrika se geskiedenis.

Ronald Peters, bestuurder van sport by die burgerregteorganisasie AfriForum, meen dié besluit is ’n “buitemagtige misbruik van gesag” en sal hoegenaamd nie die grondwetlike toets in ’n hof deurstaan nie.

Dít terwyl die VF Plus meen KSA se besluit is “skynheilig en politieke inmenging van die grofste aard”.

“Dit sal sport oor die algemeen en krieket in besonder in Suid-Afrika onmeetbare skade berokken en die VF Plus sal ʼn skrywe hieroor aan KSA rig om ten sterkste beswaar aan te teken,” sê Heloïse Denner, woordvoerder van sport by die VF Plus.

“Krieket Suid-Afrika se nuut aangestelde raad het duidelik iets om te bewys en probeer deur middel van hierdie absurde direktief politieke punte by die minister van sport aanteken. Dit sal vir KSA, en ongelukkig vir die Proteas ook, in ʼn selfgeskepte rasseslaggat ontaard.”

Solidariteit beskuldig KSA op sy beurt van “rasmalheid”.

Die organisasie het hom reeds beskikbaar gestel om enige speler te verteenwoordig wat weens die “verregaande” beleid benadeel word.

“Geen werkgewer kan sy werknemers dwing om hul trou aan ʼn politieke beweging te bewys as ʼn voorwaarde vir indiensneming nie. Spelers hoef nie te kies tussen hul gewete en hul lewensbestaan nie.

Quinton de Kock. Foto: Krieket SA/ANA

“KSA is rasboelies en Solidariteit duld nie boelies nie,” het die organisasie vanmiddag op Twitter laat hoor.

AfriForum sê die nuwe beleid skend inderwaarheid verskeie regte wat deur die Grondwet beskerm word. Dit sluit in die reg op gelykheid, die reg om nie onbillik teen iemand te diskrimineer nie, die vryheid en sekuriteit van die persoon, vryheid van godsdiens, oortuiging en mening, vryheid van uitdrukking, vryheid van assosiasie en die reg om politieke keuses te maak.

“Die besluit om die knie te buig, moet presies dít bly,” meen Peters.

“Baie top-atlete van baie verskillende nasionale, rasse en kulturele agtergronde het hul redes verskaf waarom hulle weier om die knie te buig. Baie mense wat voorheen die knie gebuig het, het onlangs besluit om dit te staak.

“Hulle redeneer dat die gebaar nie meer kragtig is nie omdat almal dit doen en dat werklike verandering stadig plaasvind of dat niks verander nie. AfriForum stem saam dat ’n gebaar alle meriete en betekenis verloor wanneer mense gedwing word. Deur beroepsatlete te dwing om afstand te doen van hul regte en vryheid is onaanvaarbaar.”

Maroela Media het vroeër berig die paaltjiewagter Quinton de Kock – wat voorheen staande gebly het – het hom Dinsdag weens “persoonlike redes” aan die Proteas se tweede groepwedstryd teen die Wes-Indiese Eilande onttrek.

“AfriForum ondersteun die standpunt wat De Kock ingeneem het om op te staan vir sy regte en die reg om te kan besluit watter inisiatiewe hy wil ondersteun,” sê Peters.

Dié burgerregteorganisasie sal met sy regspan oor die pad vorentoe vergader.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

54 Kommentare

jongste oudste gewildste
Thelsa

Man van die Reeks. Welgedaan Quinton. Kniebuig = gatkruip

Toy

Ek buig die knie voor my God en Hom alleen.

Robert

KSA… kry vir jou!

Pieter9

Volle ondersteuning; stop alle ondersteuning vir krieket.

Samuel

Quinton de Kock, ek salueer jou dat jy opstaan vir jou beginsels. Jy het ruggraat.

Ek hoop Afriforum staan agter Quinton.