Lang herstelpad lê voor na padwoede-voorval

Willem Potgieter in die hospitaal. Foto: Verskaf

Willem Potgieter (52) word steeds in die waakeenheid van die Milpark-hospitaal in Johannesburg behandel nadat hy ernstig aangerand is tydens ʼn beweerde padwoede-voorval in eMalahleni (Witbank).

“Dit gaan beter en hy vorder goed,” het Lourens Potgieter, Willem se broer, gesê. Volgens Potgieter is sy broer nog onder verdowing en word hy nou en dan bygebring.

“Hy is op die oomblik nog te swak om weer geopereer te word. Sy herstel is stadig en dit is nog nie duidelik hoe lank hy in die waakeenheid gaan wees nie en daarna gaan hy met rehabilitasie moet begin.”

Volgens kapt. Eddie Hall, woordvoerder van die polisie, word steeds gesoek na ʼn vierde verdagte in verband met die voorval op 20 Julie. Die ander drie verdagtes moet weer op 1 Oktober in die hof verskyn.

Willem en sy vrou, Santie, was die aand net na 21:00 op pad terug na hul huis in Tasbetpark nadat hulle gaan uiteet het toe die nagmerrie-aanval plaasgevind het.

Die Potgieters se bakkie. Foto: Verskaf

Vier mans in ’n Dodge Ram-bakkie het glo ’n rooi verkeerslig verontagsaam en Willem het sy toeter gedruk. Die bestuurder van die bakkie het glo stilgehou en daarna die Potgieters begin agtervolg.

Die Potgieters se bakkie is kort hierna van die pad gestamp en die bestuurder het ook herhaaldelik teen die passasierskant vasgery, wat tot gevolg gehad het dat Santie nie haar deur kon oopkry nie.

Willem het uitgeklim en ʼn waarskuwingskoot in die grond geskiet waarna drie van die mans hom oorrompel en ernstig begin aanrand het. Santie is ook aangerand. Sy het snye op haar kop opgedoen, twee ribbes gekraak en ʼn rib gebreek. Haar been is ook erg gekneus weens die skade wat aan die passasierskant van die bakkie aangerig is.

Willem het baie ernstige beserings opgedoen en daar is van die toneel met hom na die Life Cosmos-hospitaal gehaas. Hy is in ʼn geïnduseerde koma geplaas nadat hy na die Milpark-hospitaal oorgeplaas is. Sy wangbeen is vergruis, sy kaak is gebreek en hy het ʼn skedelbreuk opgedoen.

Drie mans het hulself na die voorval aan die polisie oorgegee. Hanno Bierman (30), Pieter de Beer (29) en Hannes Viljoen (28) het in die Witbank-landdroshof verskyn op aanklagte van poging tot moord en is op borgtog van R10 000 elk vrygelaat.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

53 Kommentare

jongste oudste gewildste
Salomè

Padwoede!!Dis ñ Skansen wat hulle aan die oom gedoen het.Mag geregtigheid skiet en dat hulle kry wat hul verdien..mens is nèrens veilig nie.

Wie weet

Kan nie glo hierdie ouens is op borgtog uit nie Dit is net God se genade dat hierdie man nog leef

ne

Die 4de verdagte nog soek? Is hy die GROOT skuldige? Sy maats moet maar sy naam en adres verskaf! Hulle moet verantwoordelik gehou word vir mediese koste en die egpaar vir die res van hulle lewe onderhou.

Willie

Ja nee, dagvaar die rook uit hulle uit…

marous

As nommer vier gekry word , gaan borg geweier word ?