LUR kap na Afrikaanse skole noord van Pta

panyaza-lesufi

Panyaza Lesufi. Foto: Flickr/GovernmentZA

Die Hoërskool Montana en Hoërskool Overkruin se afgetekende toelatingslyste word vandag weer deur die Gautengse onderwysdepartement geëvalueer nadat die departement klagtes ontvang het omdat sowat 33 Engelse kinders nie in die twee skole toegelaat is nie.

Panyaza Lesufi, Gauteng se LUR vir onderwys, het Dinsdagaand met 135 ongelukkige ouers en die beheerliggame van die skole vergader oor hul toelatingsbeleid.

Lesufi het onder meer tydens die vergadering gesê hy is oorval deur klagtes van ouers in die noorde van Pretoria wie se kinders nie by die skole toegelaat is nie. Hy het onderneem om die skole te dwing om te transformeer. Hy het verder gesê sy departement het R300 miljoen vir litigasie begroot in 2017 en is nie bang om organisasies soos AfriForum en die Federasie van Beheerliggame van Suid-Afrikaanse Skole (Fedsas) aan te vat nie. Hy het boonop ook gesê hy sal alles wat Hendrik Verwoerd gedoen het ongedaan maak.

Dr. Jean van Rooyen, Fedsas se Gauteng-bestuurder, meen Lesufi se uitlatings is onverantwoordelik. “Dit is onsinnige opmerkings, die onderwysdepartement kan eerder die begroting aanwend om nuwe klasse te voorsien. Verwoerd se nalatenskap het niks met onderwys te doen nie.”

Van Rooyen het ook gesê dat die skole beslis nie onwillig is om Engelse leerders te help nie. Albei skole het meer as tien jaar gelede ʼn onderrigbaan in Engels begin om die departement tegemoet te kom juis omdat daar nie genoeg Engelse skole in die omgewing is nie.

“Montana Poort High School is ook sowat ʼn jaar gelede gebou om voorsiening vir Engelse hoërskoolleerders in die noorde te maak. Die skool is egter op ʼn klein terrein gebou en bestaan net uit tydelike strukture. Die ouers van die omgewing weier om hulle kinders na die skool te neem omdat die skool ook nie oor sportgeriewe beskik nie,” het Van Rooyen gesê.

Hy reken dit is ʼn goeie voorbeeld van die onderwysdepartement se onvermoë om betyds voorsiening te maak vir die veranderende demografie van die hoofstad. Dit terwyl skole soos onder meer Montana en Overkruin reeds oorvol is.

Bernard Jacobs, beheerliggaamvoorsitter van die Hoërskool Overkruin, meen die gebeure by die skole gaan ʼn toets wees om vas te stel of die taalbeleid van ʼn skool of die sogenaamde 5 km-reël die swaarste weeg wanneer daar bepaal moet word of ʼn kind toelating by ʼn skool kry. Die 5 km-reël is in Mei vanjaar deur Lesufi ingestel en bepaal dat enige kind wat binne ʼn 5 km-radius van die skool bly by die skool plasing moet kry.

“Ek het begrip vir die Engelse kinders se reg op onderwys, maar ons het ook ʼn reg op Afrikaanse onderwys. Net soos wat hulle baklei, het ek die plig om my kinders en mense van die skool te beskerm,” het Jacobs gesê.

Sy grootste bekommernis is egter dat die ouers wat Dinsdag se vergadering bygewoon het die LUR gedreig het. “Hulle het gesê hulle gaan nie volgende jaar weer in dieselfde vergadering kom sit nie en indien hulle nie antwoorde kry nie, sal niemand volgende jaar by die skole kan skoolgaan nie. Ek vrees vir wat sal gebeur as hulle buite die skole kom betoog. Wat gaan gebeur as ʼn betoger die verkeerde ouer se kind aanvat? Ons beplan reeds ekstra sekuriteit in die nuwe jaar by die skole.”

Die Hoërskool Montana se hoof en adjunkhoofde was by die distrikskantoor om die toelatingslyste te bespreek in opdrag van Lesufi en was nie beskikbaar vir kommentaar nie. Die beheerliggaamvoorsitter van dié skool is ook gevra om nie net met die media te praat nie.

Die Gautengse onderwysdepartement is genader vir kommentaar oor die kwessie en het onderneem om so gou moontlik kommentaar te lewer op Maroela Media se navrae.

Die skole se bestuur, beheerliggame en Fedsas beplan om Maandag weer oor die kwessie te vergader. “Fedsas win tans ʼn regsmening in oor die twee skole se posisies,” het Van Rooyen gesê. AfriForum  het ook gesê die burgerregte-organisasie steun graag skole teen viktimisasie deur die LUR en sal betrokke raak in oorleg met regsadvies en Fedsas.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

64 Kommentare

jongste oudste gewildste
JC

Jy kan gaan doppies blaas, LESUFI!!

Jan

Ek voel vir hom net soveel soos hy vir my voel, nie minder nie, nie meer nie, net mooi

Johann

Hy is ‘n arrogante mens.

Hoekom

Hoekom julle obsessie oor Afrikaanse skole? Bou tswana/zoeloe/xhosa/sotho skole en sit julle eie onnies in en onderrig julle mense in hulle eie taal, hoekom net die afrikaanse skole teiken?

john

soos gewoonlik word die kar voor die perd gespan en gaan die knaap met eier in sy gesig sit.