Man kort ná familie-braai doodgeskiet

Manie Steyn. Foto: Drift Reaction via Facebook

Manie Steyn. Foto: Drift Reaction via Facebook

ʼn Man se bebloede liggaam is Sondag deur familielede in sy slaapkamer in ʼn huis in Elandsdrift naby Muldersdrift aan die Wes-Rand aangetref.

Sers. Linkie Lefakane, woordvoerder van die polisie, het gesê die man, in sy 50’s, is omstreeks 01:00 die oggend doodgeskiet, maar sy dogter het eers omstreeks 12:00 op haar pa se liggaam afgekom. Lefakane het gesê die man het koeëlwonde in sy maag en been gehad.

“Daar was geen tekens van gedwonge toegang tot die huis nie. ʼn Saak van huisbraak en moord word ondersoek,” het Lefakane gesê.

ʼn Plaaslike veiligheidsmaatskappy, Drift Reaction, het die man as Manie Steyn geïdentifiseer. Volgens Drift Reaction het familie van Steyn Saterdagaand by hom gebraai en gekuier. Hulle het hom Sondagoggend gebel om te hoor of hulle kan kom help om skoon te maak en het bekommerd geraak toe hy nie sy selfoon antwoord nie.

“Toe die familie by sy huis aankom het hulle die voordeur wawyd oop gevind en bloedstrepe gesien wat van die deur in die huis ingelei het,” het Drift Reaction op hul Facebook-blad gedeel. Die maatskappy beweer Steyn se liggaam is met drie koeëlwonde in sy bors in die slaapkamer gevind.

“Dit is nie duidelik hoe die verdagtes toegang tot die huis gekry het nie. Dit kan wees dat Manie buitentoe gegaan het om vir sy hond ʼn been te gee, omdat ʼn been naby die bloedspoor gevind is. Dit is duidelik dat hulle hom by die deur geskiet het en hy het daarin geslaag om in sy slaapkamer te kom, die deur te sluit en sy vuurwapen te kry. Die slaapkamerdeur is deur die verdagtes oopgeskop. Dit is nie duidelik wat presies in die slaapkamer gebeur het nie, maar sy liggaam is langs sy oop kluis gekry en sy vuurwapen word vermis.”

Volgens Drift Reaction word daar uit die voetspore in die bloed afgelei dat daar drie verdagtes betrokke was. Verskeie waardevolle items is uit die huis gesteel.

Lefakane het ʼn beroep gedoen op enigiemand met meer inligting om die Muldersdrift-polisiestasie by 011 952 4600 of Crime Line by 08600 10111 te bel.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

47 Kommentare

jongste oudste gewildste
Kobus

Tragies. Rus sag Oom Manie. Goei man met n sagte hart. Hoeveel nog???

Lappies

Ons word een vir een afgemaai!

Ekwilibrium

Die Oorlog van die Vlooi is nou weer in ‘n intensiewe fase (dit wipplank ononderbroke vir al meer as 25 jaar). Mag die gety vir altyd draai…

Hennie

Genade nee! Wat te erg is is te erg dit raak tyd dat ons optree.

vierkleur

dit ly kvir my dis n grooter oortreding om iets slegs op facebook te se, as om dade soos hierdie te pleeg.
Dit kry beslis meer aandag in die nuus ook.