Man in arres oor k-woord in video

‘n Skermskoot van die gewraakte video.

Die man wat pres. Cyril Ramaphosa meermale die k-woord toesnou in ʼn video op Facebook, sal Donderdag in die landdroshof in Verulam, noord van Durban, verskyn.

Brig. Hangwani Mulaudzi, Valke-woordvoerder, sê die polisie het Kessie Nair laat gistermiddag in Phoenix in hegtenis geneem op aanklagte van aanhitsing van openbare geweld en crimen injuria. Hy sê die polisie het die ondersoekdossier ná die inhegtenisneming aan die Valke vir verdere ondersoek oorhandig.

Nair is oornag in die polisieselle in Phoenix aangehou in afwagting van sy eerste hofverskyning vanoggend, sê Mulaudzi. Hy sou daar voorgekom het, maar sy verskyning is na Verulam verskuif.

Sy inhegtenisneming volg nadat die video wat Nair eergister op Facebook geplaas het, ʼn gewese metroraadslid so omgekrap het dat hy ʼn klag van naamskending by die polisie ingedien het.

“Dit het my ontstel omdat dit so rassisties van aard is,” het Brandon Pillay, tot onlangs ʼn ANC-raadslid in eThekwini se metroraad, gister aan Maroela Media gesê.

“Almal het kommentaar op Facebook gelewer,” het Pillay gesê, “maar niemand het iets daaraan gedoen nie. Ek het toe besluit om ʼn klag by die polisie in te dien.”

Hy sê die vorige gevalle waar mense suksesvol vervolg is vir rassistiese uitlatings in die sosiale media het hom aangespoor om Nair te verkla.

In die video sê Nair onder meer as stigter van die sogenaamde National Association towards Crime, Violence and Abuse “doen ek hiermee ʼn beroep vir daai (k-woord)-staatspresident mnr. Cyril Ramaphosa, ja, ek bedoel, daai (k-woord)-staatspresident Cyril Ramaphosa om aangekla te word omdat hy dié nasie bedrieg, omdat hy die nasie verdruk en hoogverraad … omdat hy misluk het en die bron is van alle misdaad, geweld, swak gesondheidsorg, armoede wat bestaan in hierdie sogenaamde ware demokrasie”.

Kessie Nair se Facebook-profielfoto. Foto: Facebook

Die video is tot dusver sowat 20 000 keer gekyk en meer as 500 keer gedeel, maar teen Donderdagoggend was dit steeds nie verwyder nie.

Brig. Jay Naicker, KwaZulu-Natalse polisiewoordvoerder, het gister gesê: “Ons beskou die aantygings [in die video] in ʼn baie ernstige lig en speurders in die kantoor van die waarnemende provinsiale polisiekommissaris ondersoek die saak.”

Intussen het Jonathan Annipen, Minority Front-woordvoerder, bevestig Nair was jare gelede ʼn raadslid van die MF in die eThekwini-metroraad. “Dit was lank voor my tyd, maar ek weet hy het daarna oorgeloop na die IVP, waarna hy sover ek weet vir bedrog vervolg is.”

Annipen beskryf Nair as ʼn “sosiale skurk” wie se uitlatings “nie met die Indiese gemeenskap vereenselwig kan word nie; trouens, ons gemeenskap behoort geloof te word vir ons volgehoue pogings om maatskaplike samehorigheid in die land te bewerkstellig.”

Hy sê sy party distansieer hom ten sterkste van Nair se tirade. Hulle het intussen ʼn klag by die Menseregtekommissie ingedien om seker te maak Nair kry met die volle mag van die gereg te doen.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

53 Kommentare

jongste oudste gewildste
jannie

Waar is vryheid van spraak in die “demokratiese” land……??

waarheid

Jip Ramaposa het ons aan die Chinese uitverkoop .
Dit is duidelik sigbaar met al die Chinese wat al in S A is en ook al plase in die Boland besit. Hy verkoop sy eie mense uit sodat die Oosterlinge hier kan kom buit en gryp.
Ek verstaan die man se frustrasie.

Ek is egter teen die woord gekant wat Nair gebruik het en ook teen bedrog wat hy kon gepleeg het maar stem saam met sy siening oor die gemors waarin ons land verkeer.

MRK

Kill the Boer is NIE rassisties nie maar die K woord is rassisties .. wat ‘n sirkus .. ons regering is ‘n SIRKUS.

Raadop

In Amerika is daar mense wat na Donald Trump as n aap verwys,die goed wat hy toegesnou word op televisie en in die media is nog rowwer as wat hier gese word,demokrasie werk in daardie land want daar is vryheid van spraak. Net een vraag,hoeveel nie-swart mense is al openlik gevloek en sleggese wat duidelik rassisme is,hoekom word daar niks daaraan gedoen nie? So met my as n witmens kan gepraat word nes hulle wil en niks sal daarvan kom nie? Hierdie man is so vinnig in hegtenis geneem omdat hy sy persoonlike mening uitgespreek het. Hoeveel mense word daagliks… Lees meer »

Koos de Meyer.

Waar is die vryheid van spraak nou. Net Malema en sy travante het vryheid van spraak. Die land is siek verby.