Meer as 10 000 siviele eise teen SAPD ingedien

(Argieffoto: Maroela Media)

Altesaam 10 689 siviele eise ter waarde van R16,7 miljard is die afgelope finansiële jaar teen die Suid-Afrikaanse Polisiediens ingedien.

Ian Cameron, woordvoerder van die burgerregte organisasie Action Society, sê dié syfers is die afgelope week tydens ʼn vergadering van die portefeuljekomitee oor polisie bekendgemaak. “Die benarde finansiële toestand en die feit dat siviele eise teen die SAPD toeneem, is vir ons geen verrassing nie. Die SAPD word gebruik as die ANC se politieke instrument en kaderontplooiing het die instansie laat ineenstort.”

“Dis kommerwekkend dat laboratoriumdienste slegs 7.3% van hul toegewysde begroting spandeer het – terwyl daar ʼn yslike DNS-agterstand van meer as 300 000 sake bestaan. Dit is ʼn krisis en regsdwaling wat al sedert Junie 2020 toeneem.”

Daar is ook onthul dat slegs 14.59% van nuwe DNS-bewyse binne ʼn 90 dae periode afgehandel is. Hofsake word van die rol geskrap en oortreders van gewelddadige misdaad en aanranding met die doel om ernstig te beseer word vrygelaat – maar tog is daar nog geen dringende optrede van minister Bheki Cele om die DNS-agterstand op te los nie, sê Cameron.

“Spesialis-kennis binne die SAPD het drasties afgeneem en die gehalte van opleiding van SAPD-beamptes is ook ʼn groot kommernis. Daar was die afgelope twee jaar geen nuwe rekrute nie en dit plaas ekstra druk op bestaande lede wat reeds oorwerk en hulpbronbehoewend is. Die SAPD, onder die swak leierskap van Bheki Cele, het ʼn verswakte regeringsinstansie geword en bied geen beskerming of sekuriteit aan die burgers van Suid-Afrika nie.”

Van die ander bevindings in die verslag, wat deur die kantoor van die ouditeur-generaal saamgestel is, het onthul dat slegs 24 133 uit 62 000 vuurwapenlisensie-aansoeke binne 120 dae geprosesseer is. Altesaam 545 mense het uit polisie-aanhouding ontsnap en ʼn verbysterende R1,6 miljard is aan BBP-beskerming spandeer.

“Kaderontplooiing en wanbesteding het ʼn eens magtige SAPD verwoes. Dit is nou ʼn ystervuis vir die politieke elite wat belyn is met die ANC. Alternatiewe moet oorweeg word – of dit nou afwenteling, verhoogde betrokkenheid van die privaat sektor of algehele herstrukturering is – as iets nie verander nie, sal anargie voortduur. Die SAPD kom nie sy mandaat na nie en versaak die burgers van Suid-Afrika.”

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

18 Kommentare

jongste oudste gewildste
Erita

Hoekom moet ons Pa staan vir hulle optrede?
Laat hulle self persoonlike dekkings kry en betaal

Jackie

Whats new.

Truthful

Ek vertrou geen staatsamptenare nie

Johan

Die probleem het ingekom toe regstellende aksies ingetreë en dit het verger toe hulle die “performance” nonsense ingebring het. Want nou word verwag dat soveel arrestasies n maand gemaak word. Dan word druk toegepas. Meeste van die tye word gearresteer om te ondersoek in plaas van onderdoe om te arresteer. Die bestuur van die SAPD moet pa vir die siviele begin te staan.

Pieter

Ja en ons belasting betalers betaal die niks werd s. a. p se selarisse n kommunis bly maar net n niks werd.