MultiChoice reageer op Ghoema-besluit

MultiChoice het Woensdag gesê hy het versoek dat Steve Hofmeyr nie deel vorm van die Ghoema-musiektoekennings nie omdat die sanger se sienings nie met die maatskappy se waardes ooreenstem nie.

MultiChoice het versoek dat die musiekvideo van “Die Land”, waarin Hofmeyr saam met ander kunstenaars sing, van die benoemingslys van die Ghoema-musiektoekennings verwyder word.

Joe Heshu, MultiChoice se groephoof van korporatiewe bestuur, het aan Maroela Media gesê hulle staan by die besluit om te versoek dat Hofmeyr van die benoemings verwyder word omdat hulle diskriminasie ten sterkste veroordeel.

“MultiChoice is verbind daartoe om ʼn nierassige samelewing te bou en ons is gekant teen enige vorm van diskriminasie. MultiChoice is trots dat ons Afrikaans ondersteun, nie net as ʼn belegging in inhoud op ons DStv-platforms nie, maar ook deur ons borgskappe vir feeste, geleenthede en die wyer Afrikaanse kunstebedryf.”

Heshu het gesê dié besluit verander wel nie hul verbintenis tot Afrikaans en alle ander plaaslike tale nie.

“Dit het onder ons aandag gekom dat Steve Hofmeyr benoem is vir ʼn Ghoema-musiektoekenning in die kategorie van beste musiekvideo. Ons het versoek dat hy nie deel vorm van die geleentheid wat ons borg nie omdat sy sienings nie met ons waardes ooreenstem nie,” het Heshu gesê.

“Ons verwelkom ʼn samelewing waar vryheid van spraak gevier word, maar ons neem standpunt in teen rassisme.”

Steve Hofmeyr by die mediakonferensie in Centurion. (Foto: Janie Monsieur/Maroela Media)

MultiChoice het gedreig om sy borgskap van dié geleentheid te beëindig indien die nominasie nie onttrek word nie. Heidi Edeling, hoof‑ uitvoerende beampte van die Ghoemas, het gesê daar is toe by wyse van ʼn demokratiese stemproses besluit dat die benoeming onttrek word.

Talle kunstenaars soos Jay, Bobby van Jaarsveld, Bok van Blerk, Dewald Wasserfall en Nicholis Louw het laat hoor dat hulle nie meer die Ghoemas gaan bywoon nie.

Die Ghoema-toekennings word Woensdagaand in die Sun Arena in Pretoria gehou. Dit sou aanvanklik regstreeks op kykNET uitgesaai word, maar volgens Suzanne Keyter, woordvoerder van die kanaal, is daar reeds vroeër besluit om dit nie te doen nie weens die groot aantal benoemings. Volgens haar hou die besluit geensins verband met die onlangse verwikkelinge nie en is dit reeds vroeër geneem.

Die toekennings word nou Saterdag 20 April om 20:00 op kykNET, DStv-kanaal 144, uitgesaai. Die blou tapyt word op Sondag 21 April om 18:30 op kykNET NOU!, DStv-kanaal 146, uitgesaai met ʼn heruitsending van die toekennings direk daarna.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

179 Kommentare

jongste oudste gewildste
Wayne

Ek kanselleer my Dstv onmiddellik.

MyFlokMarelize

Liewe MultiChoice … gaan julle almal boelie wat nie met julle siniele sienings saamstem nie? Wat het geword van vryheid van spraak?

Rohan

Snaaks dat hulle (MultiChoice) sê hulle diskrimineer nie. Wat van die aandele wat slegs vir ander kleurige mense beskikbaar gestel is en nie vir ons vaal velletjies nie? Ek het gelukkig my DSTV al lank terug gekanselleer. Netflix en Youtube bied ure se plesier.

Apie

Wsyne, ek ook. Sal graag n volledige uiteensetting van multichoice se WAARDES wil sien. Boikot multichoice.

Naas Vermaak

Die eerste paragraaf is heeltemal verkeerd gestel….dit moet lees …”Multichoice se sienings stem nie ooreen met die sanger se waardes nie”…..en so ook die res van die land se waardes nie!!!