Die musikant Thoriso Themane se moordenaars, onder wie vier tieners, is Woensdag gevonnis. Themane (28) is in 2019 in ʼn park in Polokwane, Limpopo, doodgeslaan.
Twee volwassenes, Chuene Maleka en Alfred Mothapo, het saam met ses tieners in die landdroshof in Polokwane verskyn in verband met Themane se moord. Die tieners was ten tyde van die aanranding tussen 14 en 16 jaar oud. Hulle is nou 18 jaar of ouer.
Volgens Mashudu Malabi-Dzhangi, woordvoerder van die Nasionale Vervolgingsgesag (NVG), het die vonnisoplegging ingevolge die Wet op Kindergeregtigheid geskied aangesien die misdryf gepleeg is toe die tieners minderjarig was.
Daar was aanvanklik sewe tieners in die saak betrokke, maar een – Tlisetso Mphahlele (14) – het voor die verhoor gesterf.
Vier van die tieners, Kgothatso Tumelo Teffo (18), Raofa Mahloromela Vincent Mothemela (18), Tshiamo Miyeni (19) en Lesetja Kabelo Ramokgopa (20), is in Desember skuldig bevind op aanklag van moord. Hulle is elk tot tien jaar tronkstraf gevonnis.
Die ander twee tieners, Thabang Mohubedi (20) en Adaho Mudau (20), wat skuldig bevind is op aanklag van aanranding, is elk drie jaar tronkstraf opgelê wat vir vyf jaar opgeskort is.
Maleka en Mothapo is elk ’n boete van R20 000 opgelê of vyf jaar direkte tronkstraf op aanklag van aanranding met die doel om ernstig te beseer.
Maroela Media het vroeër berig Themane, ʼn plaaslike musikant van Polokwane, is op 23 Februarie 2019 in die Florapark in die stad aangerand, waarna hy vir dood agtergelaat is. Themane was glo op pad huis toe van ʼn musiekoefening by sy kerk toe hy deur ʼn groep oorval en aangerand is.
Video’s van die voorval wys hoe ʼn bebloede Themane gesleep, geslaan en geskop word en hoe sy liggaam later in die straat afgesleep word. Themane het later in die hospitaal aan sy beserings beswyk.
Dit gaan my verstand te bowe hoekom iemand wat moord pleeg nie lewenslank tronkstraf kry nie ? Ek meen jy het iemand se lewe geneem
Ek is bly die gemors is gevonnis.
Verregaande, absoluut verregaande. Ons maak dronkaards (taverne) en moordenaars groot en dis aanvaarbaar vir die samelewing en ‘n baie groot grap
Hoe de……. opgeskorte vonnisse vir aanranding. En 10 jaar vir moord.
Hieruit kan ons duidelik sien hoe hulle “kinders” opgevoed word. Geen wonder hulle ruk handuit in Taverns en skole nie. Sien SWAAR dae wat voorle vir hierdie land met joeug soos DIE in die samelewing.