Musikante tydens skiet van musiekvideo aangeval

Riaan Smit nadat hy aangeval is.

Die sanger Riaan Smit, veral bekend as lid van die rock-groep Crimson House, is Vrydag na ʼn hospitaal geneem nadat hy en die musikant Luca Hart tydens ʼn opname vir ʼn musiekvideo net buite Windhoek deur ʼn groep mans aangeval en beroof is.

Smit, wat tans in die Kaap bly, het ernstige beserings opgedoen nadat hy met ʼn baksteen in die gesig geslaan is en met ʼn mes in die arm gesteek is.

Marinette Potgieter, ʼn agent vir Crimson House, het Saterdag die voorval aan Maroela Media bevestig.

Potgieter sê ʼn groep van vyf of ses mans met balaklawas, wat met messe gewapen was, het die twee musikante en drie bemanningslede glo onverwags betrap.

“Dit het veral gelyk asof hulle vir Luca en een van die vroue van die bemanning geteiken het,” sê Potgieter. “Riaan het daarom voor hulle ingespring om die vroue te beskerm. Hulle het hom weggestamp en die vroue weer geteiken, maar hy het weer voor hulle ingespring waarna hy met ʼn baksteen geslaan is en toe na die grond geval het.”

Smit en Hart met hul aankoms in Windhoek.

Die groep is van meer as 20 items toerusting, wat gebruik is om die musiekvideo te skiet, beroof. Onder dié items tel onder meer kameras, selfone en mikrofone. Die verdagtes het nie Smit se kitaar gesteel nie.

“Luca se mandolyn, wat vir haar van baie sentimentele waarde is, is ook in die voorval gesteel,” sê Potgieter.

Smit is na die hospitaal geneem waar ʼn mediese dokter aanvanklik nié kon sien dat hy ʼn fraktuur aan sy bo-kaak opgedoen het nie.

“Hy was Saterdag na ʼn tandheelkundige chirurg wat ons in kennis gestel het dat hy ʼn fraktuur aan sy bo-kaak het. Die chirurg, dr. Chris de Chevonnes Vrugt [die pa van Crimson House se tromspeler], het gesê Smit sal ʼn operasie moet ondergaan om plate in te sit. Hy het ook bloedvate in sy oë gebars,” sê sy.

Potgieter moes intussen noodgedwonge twee van Smit se konserte in Namibië kanselleer. Hy het Sondag teruggekeer na Suid-Afrika om Maandag ʼn chirurg in die Wes-Kaap te sien.

“Riaan is ons trooper – hy is ʼn regte soldaat. Dis sleg dat ons die konserte moes kanselleer, maar hy sal weer binnekort op die verhoog wees.”

 

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

24 Kommentare

jongste oudste gewildste
Leahim

Tragiese voorval maar die polisie sal hulle vang en swaar straf want nie soos in SA is die polisie in beheer in Namibië en nie die kriminele.

amanda

dis steeds hartverskeurend dat die dinge gebeur. ons mag nie ophou waaksaam wees en bid nie. Amanda

Kannaland

Hier begin Nam ook verkrummel. as gevolg van die wereld se toleransie vir misdadigers.

Albert

Klink my Namibie begin ook verval

Skepties

Ek wou Etosha toe gaan die komende vakansie. Gaan nou maar liewer Botswana toe.