Niemand vervolg oor Clifton-skaapslagtery

Betogers op ʼn strand by Clifton in Kaapstad waar hulle ʼn skaap geslag het as deel van ʼn betoging teen rassisme. Volgens die betogers was die slagting van die skaap gedoen om die Moederstad “te reinig van rassisme”. Foto: Phando Jikelo/African News Agency

Die minister van polisie het aangekondig dat niemand vervolg gaan word nie vir die opspraakwekkende slag van ʼn skaap op die Clifton-strand in Kaapstad in Desember.

Genl. Bheki Cele het gesê die rede hiervoor is omdat die polisie geen spesifieke munisipale regulasie of wet vind om die betrokkenes mee te straf of te vervolg nie.

Dit blyk uit ʼn skriftelike parlementêre antwoord deur Cele op ʼn vraag van Cope-LP Willie Madisha.

Volgens Cele kan niemand vervolg word nie, want die slag van die skaap was nie teen die Wet op Vleisveiligheid nie.

Hoewel die wet primêr bepaal dat niemand in die openbaar ʼn dier mag slag behalwe by slagpale nie, maak die wet ʼn spesifieke uitsondering in geval van die slag vir ʼn dier om kulturele of godsdienstige redes.

Diegene wat die skaap geslag het, het indertyd aangevoer hulle doen dit as kulturele reinigingseremonie.

Hoewel Rooivleisregulasie 129 volgens Cele bepaal dat die tersaaklike plaaslike owerheid (in hierdie geval die Stad Kaapstad) skriftelik toestemming moet gee vir ʼn openbare slagtery buite die slagpale, word geen sanksie of straf voorgeskryf ingeval skriftelike toestemming nie bekom word nie.

Ten spyte van stellings deur die Kaapse burgemeester, Dan Plato, dat Kaapse munisipale regulasies oortree is, kon die polisie volgens Cele geen sodanige regulasies opspoor nie.

Betreffende die gebrek aan polisieoptrede op die dag van die slagtery het Cele die destydse aanbeveling van genl.maj. Jeremy Veary van die polisie onderskryf.

Dit was om nie op te tree nie weens die onsekerheid of ʼn regulasie oortree word, die risiko van geweld en die omvang van die skare.

“Dit was uiteindelik onmoontlik om teen enigiemand spesifiek op te tree weens die onsekerheid oor ʼn regulasie wat uiteindelik geblyk het nie te bestaan nie,” aldus Cele.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

26 Kommentare

jongste oudste gewildste
KrokodilBotha

Jip daai man met daai hoed het nie die wilskrag of moed nie. Niks nuut al die gepraat en bokkorol doen. Praat nie net van die geval nie.

M'Lady

Jammer, maar dis onaanvaarbaar. Hierdie was dieremishandeling. “Kultuur” word gebruik om allerhande wreedhede teenoor diere te regverdig en dit moet stop.

Realis

Het enige iemand op enige stadium GEDINK enige iets sou gebeur het??

Werner

Hulle is mos nie wit nie as hulle was sou die DA seker gemaak het dat hulle vervolg word

Riaan

What is new?