Nog moordklagte teen Werner De Jager

Werner de Jager. (Foto: Isabel Venter/Maroela Media)

Dit is nie meer bloot ’n gerug dat ’n tweede verdagte in die moord op ds. Liezel de Jager in hegtenis geneem gaan word nie.

Só het die Amanzimtoti-landdroshof Maandag gehoor tydens slotbetoë in die borgtogaansoek van Werner de Jager (45)  – Liezel se wewenaar wat nou die hoofverdagte in haar moord is.

De Jager sal ook binnekort aangekla en in hegtenis geneem word op nog twee aanklagte van moord in verband met die motorongeluk verlede jaar op die N1-snelweg naby Kroonstad waartydens twee vroue gesterf het.

Dié klagte sou aanvanklik strafbare manslag wees, maar die direkteur van openbare vervolging (DVO) het reeds beslis dat dit na ʼn moordklag aangepas moet word.

Gayle Greyling, staatsaanklaer, het Maandag die hof meegedeel van die DVO se beslissing.

“Die besluit dat hy [in verband met die nuwe aanklagte] in hegtenis geneem moet word, is reeds geneem. Daar sal hierdie komende Donderdag ʼn vergadering wees om te reël dat die saak van die Vrystaat na KwaZulu-Natal oorgeplaas kan word om onder die jurisdiksie van daardie provinsie se howe vervolg te word … en ʼn tweede inhegtenisneming is nie meer net beweringe nie. Dit sal ook tydens Donderdag se vergadering bespreek word,” het Greyling gesê.

Werner de Jager kom Maandag by die landdroshof op Amanzimtoti aan. (Foto: Isabel Venter/Maroela Media)

Luidens die DVO-besluit het De Jager, ten spyte daarvan dat hy geweet het hy ly aan breinfloutes, steeds agter die stuur van ʼn motor geklim. Dié besluit het die lewens van Berniece en Linda Cornelia Eales geëis.

Volgens Greyling het De Jager erken hy sukkel met breinfloutes en om gebeure te onthou. “Hy moes voorkomend opgetree en nie bestuur het as hy geweet het hy sukkel met breinfloutes nie, maar tog het hy daardie dag [13 April 2023] roekeloos en nalatig bestuur.”

Verder voer die staat aan De Jager het die moord op Liezel haarfyn beplan nadat hy verskeie lewenspolisse in haar naam uitgeneem en ook haar testament gewysig het sodat hy die enigste begunstigde sou wees.

“Die staat sal ook later bewys dat die applikant [De Jager] die moord só beplan het sodat hy kon voortgaan  – ten spyte van die publiek se verontwaardiging oor die moord – met sy intieme verhouding met ʼn ander man,” sê Greyling.

Sy het by die hof gepleit om nie borgtog aan De Jager toe te staan nie.

“Die hof, die staat, en die polisie, ons is almal hier om die stem vir Liezel te wees.”

Greyling het ook in die hof onthul dat De Jager selfdood oorweeg het in die Westville-gevangenis waar hy aangehou word.

Volgens Greyling het De Jager onwetend sy planne – om weer sy eie lewe te neem – met polisie-informante in die tronk gedeel.

Dit is een van die redes waarom dit nié in die belang van geregtigheid sal wees om borgtog aan De Jager toe te staan nie, aldus Greyling.

Sy het verder betoog De Jager sal ʼn gevaar inhou vir die samelewing en ook ʼn vlugrisiko wees.

“Die staat ontken ten sterkste dat dit ʼn swak saak het …. daar is ʼn lang lys van getuienis, direk sowel as omstandigheidsgetuienis, teen hom. Sy kinders sal ook later kom getuig,” het Greyling gesê.

Ter afsluiting het sy genoem dat Liezel se ouers in vrees lewe vir De Jager en die hooggeregshof sal nader om alle besoektye met die kleinkinders te stop. Luidens ʼn hooggeregshofbevel mag De Jager sy kinders een keer ʼn maand, onder toesig van sy skoonpa, besoek.

Plakkate met die vermoorde ds. Liezel de Jager se foto daarop buite die landdroshof in Amanzimtoti. (Foto: Isabel Venter/Maroela Media)

Adv. André May, De Jager se regsverteenwoordiger, het op sy beurt betoog die staat se saak is swak en maak staat op “vae verklarings en bewerings”.

Volgens hom steun die staat slegs op omstandigheidsgetuienis, en geen direkte getuienis wat na De Jager wys nie.

“Hy is vroeg in die ondersoek al as ʼn verdagte uitgesonder, maar dit het meer as 23 maande geneem om hom in hegtenis te neem … en dit wil voorkom of dit ook al is wat intussen gebeur het, want dit is duidelik die ondersoek is nog nie afgehandel nie; hoekom vat dit so lank om die mees basiese ondersoek af te handel? Die saak kan nog minstens drie jaar sloer, en dit sal nie in die belang van geregtigheid wees om die applikant vir die duur van die saak in hegtenis te hou nie.”

Hy het onder meer verwys na die bevindings van ʼn forensiese kriminoloog wat bevind het Liezel is deur iemand na aan haar vermoor.

Werner de Jager. (Foto: Isabel Venter/Maroela Media)

“Sy het, deur die aard van haar werk, gereeld nabye kontak met ander mense gehad,” het May betoog.

Hy het bygevoeg dat De Jager nie sal inmeng met die ondersoek of enige getuies nie. De Jager hou ook nie ʼn gevaar in vir homself of die publiek nie.

“Die publiek moet onthou ons verstaan nog nie als wat in die dossier is nie. Hoe kan hulle hom dan al reeds as skuldig sien? Dit is nie die toets hier vandag nie,” sê May.

Hy het onder meer na ʼn groep betogers buite die hof verwys wat De Jager met sy aankoms uitgejou en ʼn “vark” genoem het.

De Jager se saak hervat Dinsdag ná die hof Maandag gesluit het sodat hy betyds terug by die tronk besorg kon word.

Sy was geliefd

ʼn Groep betogers, onder leiding van die drukgroep Action Society, het Maandag by die hof bymekaar gekom. Die groep het De Jager met geel blomme en plakkate by die hof ingewag. Geel was Liezel se gunstelingkleur.

Liezel, destyds verbonde aan die NG-kerk Suidkus-gemeente, se liggaam is op 13 Oktober 2021 in die oprit van die pastoriewoning ontdek nadat sy gaan draf het.

“Sy was geliefd deur ons almal en het so baie vir ons gedoen,” het Joanne Herbst van Elders Voice KZN buite die hof gesê.

“Ons het nou saam met Liezel gewerk. Baie van die ou mense, wat ons uit haglike omstandighede moes red, is deur haar en haar gemeente bygestaan.”