Noordwes-betogings: ‘Polisie het beheer oor gebied’

Vragmotors wat deur betogers in Coligny in Noordwes aan die brand gesteek is (25 April 2017). Foto: Facebook via Marlene Roux

Die Suid-Afrikaanse Polisiediens (SAPD) het Woensdag bewerings ontken dat die polisie nie beheer oor die situasie in Lichtenburg en Coligny in Noordwes, waar gewelddadige betogings al dae lank woed, het nie.

Brig. Vishnu Naidoo, woordvoerder van die polisie, het gesê hoewel die provinsiale polisie die situasie behoorlik hanteer het, is daar vroeër besluit dat nasionale ingryping nodig was. Addisionele polisiebeamptes van die eenheid vir openbare orde, die taktiese reaksie-eenheid en die eenheid vir sigbare polisiëring is na Lichtenburg, Coligny en Itsoseng ontplooi.

“Die verhoogde sigbaarheid van polisielede en geteikende operasies het onmiddellik gehelp om die gebied te stabiliseer,” het Naidoo gesê. “Gedurende hierdie operasies is 48 mense in hegtenis geneem. Ses mense is op aanklagte van openbare geweld in hegtenis geneem, terwyl twee vasgetrek is nadat hulle ʼn polisie-njala aan die brand gesteek het. Altesaam 42 mense is in hegtenis geneem vir die besit van vermoedelik gesteelde goedere nadat hulle na bewering winkels in die gebied geplunder het.”

Naidoo het gesê nog twee mans is in hegtenis geneem in verband met die dood van ʼn 12-jarige seun in Coligny. Die seun se dood was na bewering die oorsaak van die geweld in die dorp.

Betogings in Coligny en Lichtenburg in Noordwes (April 2017). Foto: Facebook via Intelligence Bureau SA

Maroela Media het vroeër berig verskeie vragmotors en huise is die afgelope paar dae deur betogers aan die brand gesteek, winkels geplunder en talle ondernemings erg beskadig. Paaie in die gebied was met tye onbegaanbaar en talle voertuie is deur betogers met klippe bestook.

“Die inhegtenisnemings van mense wat by onwettige aktiwiteite betrokke is, is aanduidend dat die polisie geen vorm van geweld of wetteloosheid sal duld nie,” het Naidoo gesê. “Hoewel ʼn mate van rustigheid in die gebied herstel is, gaan die polisie voort om die situasie te monitor. Bewerings wat in sekere dele versprei is dat die polisie nie beheer oor die situasie het nie, word weerlê.”

Hy het gesê die polisie is tans in gesprek met verskeie sektors van die gemeenskap wat hul daartoe verbind het om saam met die polisie te werk om stabiliteit in die gebied te herstel.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

22 Kommentare

jongste oudste gewildste
Johann

Hulle het beheer verkry toe die oproermakers reeds die pad gevat het. Nou pas hulle bouvalle op en beveilg dit.

Riaan

Wonderlike nuus! Mense mag van my verskil, maar ek sê vir Die Here dankie. Hierdie kon lelik(er) geword het. Ek hoop van harte die brandstigters sal behoorlik vervolg en deur hof gestraf word, want ek het nog nooit gehoor van enige persoon wat gestraf is vir brandstigting nie en dis die wat hulle dit so maklik doen.

Leendert

Die nuwe SA is strate beter as die ou SA.

Adam

Brig Naidoo, jy is 25 dae the laat met die April-grap. In SA gebruik ‘n mens nie “polisie” en “beheer” in dieselfde sin nie.

Celia

Is dit hoe polisie beheer in SA lyk?