Odette Barkhuizen se moordenaar lewenslank gevonnis

Odette Barkhuizen. Foto: Facebook

George Barkhuizen is Vrydag lewenslange tronkstraf in die Johannesburgse hooggeregshof opgelê vir die moord op sy vrou, Odette, in 2015.

Barkhuizen is tot 25 jaar tronkstraf gevonnis vir die voorafbeplande moord op Odette (43). Hy is verder 15 jaar tronkstraf vir bedrog, ses jaar tronkstraf vir die onwettige besit van ʼn vuurwapen en twee jaar tronkstraf vir die onwettige besit van ammunisie opgelê.

Die vonnisse sal gelyklopend uitgedien word.

Diane Bartlett, ʼn vriendin van Odette, het die vonnis aan Maroela Media bevestig.

Odette is in Junie 2015 in die oprit na haar kantoor in Glenvista in Johannesburg doodgeskiet. Sy was die eienaar van ’n motorruitherstelonderneming.

Barkhuizen is maande ná die moord in hegtenis geneem nadat talle bewyse aan die lig gekom het dat hy agter sy vrou se moord sit. Verskeie aspekte het op Barkhuizen se betrokkenheid by Odette se moord gedui, onder meer dat hy glo versekering van miljoene rande op haar lewe uitgeneem het slegs enkele weke voor haar dood.

George Barkhuizen word destyds in hegtenis geneem. Foto: Verskaf

Barkhuizen het destyds beweer dat hy nie naby die misdaadtoneel ten tyde van sy vrou se moord was nie, maar selfoonrekords het later bewys dat hy wel op die toneel was.

Maroela Media het vroeër berig Odette se familie het dadelik ná die moord vermoed dat haar man daarvoor verantwoordelik is.

“Ons het dit heeltyd vermoed. Hulle twee seuns, Warwick [tóé 23 jaar oud] en Wade [tóé 17 jaar oud] het vir ons dadelik ná hulle ma se dood gesê hulle vermoed hulle pa is betrokke. Daar was soveel bewyse wat op sy betrokkenheid gedui het. Dit was nie ʼn skok toe hy in hegtenis geneem is nie,” het Pamela Immelman, Odette se ma, destyds gesê.

Immelman wou nie kommentaar lewer op die vonnis nie.

Barkhuizen was 45 jaar oud toe hy die moord gepleeg het.

Lees alle berigte oor Odette Barkhuizen op Maroela Media hier.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

28 Kommentare

jongste oudste gewildste
Ekke

Nou hoe is dit dat Coert Kruger van Vanderijlpark ook skuldig aan moord op sy seun gevind is (skuldig gepleit) en met ‘n waarskuwing uit die hof gestap? Word regters, aanklaers ens wel omgekoop?

Elna

Die arm van die gereg is lank en so seevier die waarheid altyd. Sterkte aan Odette se familie en kinders mag julle berusting vind.

Johan

Moet Maroela nie dalk in sy berigte ophou met die valse prentjie wat ‘n vonnis van “lewenslank” of 25 jaar en dan “verder 15 jaar” nie.
Dit bring die leser onder die indruk van ‘swaar straf. Die berig sê welliswaar verder aan dat die vonnisse gelyklopend uitgedien sal word – maw die persoon gaan eintlik maar vir so ongeveer 13 jaar tronk toe vir moord met verswaremde omstandighede
Begin asseblief eerder skryf van die effektiewe tyd agter tralies want dan weet ons mos die “groot” vonnis is ‘n klug.

Vra net

Was die gestremde seun Warwick ooit opgespoor?

Elaine

25 jaar is nie lewenslank nie. Lewenslank is lewenslank as dit nie aan ‘n jaar getal gekoppel word nie. Hulle bly daar totdat hulle einde kom.