Onteiening: Plekke en datums vir openbare verhore bekend

Argieffoto

Die plekke en datums in al nege provinsies waar openbare verhore sal plaasvind oor die moontlike verandering van die Grondwet om grondonteiening sonder vergoeding moontlik te maak, is deur die parlement bekend gemaak.

Die openbare verhore sal op verskeie plekke in elk van die nege provinsies plaasvind, en min dele van die land word nie gedek nie.

Die openbare verhore is slegs een van die maniere waarop die publiek se mening ingewin word. Daar is min of meer vier ander prosesse wat ook op die parlementêre besluit inwerk.

Eerstens was daar die skriftelike voorleggings. Na wat in die parlementêre wandelgange vertel word, is ’n verstommende 750 000 skriftelike voorleggings ontvang, wat waarskynlik ’n rekord is. Dan sal daar ook mondelinge insette deur kundige en organisatories verteenwoordigende rolspelers en belanghebbendes wees, voor formele sittings van die veelparty ad hoc-komitee, wat die uiteindelike aanbeveling moet maak, in die parlementsgebou sal plaasvind.

Dit is algemeen vir die parlement se navorsingsafdeling, en soms die parlement se begrotingskantoor en regshulpafdeling, om afsonderlik insette te lewer, met onderskeidelik buitelandse presedente, geldelike implikasies en regskwessies as hul onderskeie fokusse. Die onderskeie politieke partye se koukusse sal hul insette lewer, waarna ’n debat en stemming in die Nasionale Vergadering sal plaasvind. Enige proses om moontlik die Grondwet te verander, sal eers daarna ’n aanvang neem.

Wat die openbare verhore betref – dit kan deur enige lid van die publiek bygewoon word en soveel moontlik mense sal ’n spreekbeurt kry.

In Limpopo vind vier verhore plaas:

op 27 Junie om 11:00 in die Marble Hall-stadsaal;
op 28 Junie om 11:00 in die Aboo A Tayob-saal in Mokopane (Potgietersrus);
op 29 Junie om 11:00 in die Lenyenye-gemeenskapsaal by Tzaneen; en
op 30 Junie om 11:00 in die stadsaal van Thohoyandou.

Inwoners van Mpumalanga kry drie geleenthede om hul menings te lug:

op 2 Julie om 11:00 in die AG Communiosaal in Nelspruit;
op 3 Julie om 11:00 in die Ermelo-stadsaal; en
op 4 Julie om 11:00 in die Adelaide Tambo-saal in Middelburg.

Die drie geleenthede in Noordwes is as volg:

op 17 Julie om 11:00 in die Taung-gemeenskapsaal;
op 18 Julie om 11:00 in die Mahikeng-burgersentrum; en
op 19 Julie om 11:00 in die Rustenburg-burgersentrum.

Gautengers het drie geleenthede:

op 26 Julie om 11:00 in die Westonaria-burgersentrum;
op 27 Julie om 11:00 in die Vereeniging-stadsaal; en
op 28 Julie om 11:00 by die Lucas van der Berg-gemeenskapsaal in Pretoria-Wes.

Mens kan seker net kopskud oor die motiewe hoekom die Wes-Kaap, ’n relatief klein provinsie, die meeste openbare verhore het, maar daar is vyf:

op 1 Augustus om 11:00 by die Thusong-sentrum in Oudtshoorn;
op 2 Augustus om elfuur by die ontspanningsaal in Beaufort-Wes;
ook op 2 Augustus om elfuur by die Thusong-sentrum op Citrusdal;
op 3 Augustus om 11:00 by die Thusong-sentrum op Swellendam; en
op 4 Augustus (met algemene inwoners van Kaapstad – nie parlementslede nie – as fokus) in die Ou Volksraadsaal van die parlement in Kaapstad.

Die uitgestrekte Noord-Kaap het vier geleenthede:

op 26 Junie om 11:00 by die Concordia-saal in Springbok;
op 28 Junie om 11:00 in die Tol Speelmansaal in Upington;
op 29 Junie om 11:00 in die Thabo Moorosi- veeldoelige sentrum in Mothibistad; en
op 30 Junie om 11:00 in die Kimberley-stadsaal.

Die drie geleenthede in die Vrystaat vind plaas:

op 2 Julie om 11:00 in die Samson Sefuthi-gemeenskapsaal in Botshabelo;
op 3 Julie om 11:00 in die Ferdie Meyersaal in Welkom; en
op 4 Julie om 11:00 in die veeldoelige sentrum in Phuthaditjhaba.

Daar is vier geleenthede vir KwaZulu-Natallers om hul mening te lug:

op 18 Julie om 11:00 in die Cecil Emmetsaal in Vryheid;
op 19 Julie om 11:00 in die Mabhonyeni-saal in Jozini;
op 20 Julie om 11:00 in die stadsaal van Pietermaritzburg; en
op 21 Julie in die stadsaal van Kokstad.

Ons sluit af met die vier geleenthede vir openbare verhore in die Oos-Kaap:

op 23 Julie om 11:00 in die stadsaal van Umtata;
op 25 Julie om 11:00 in die stadsaal van Queenstown;
op 26 Julie in die Orient-teater in Oos-Londen; en
op 28 Julie om 11:00 in die stadsaal van Jansenville.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

30 Kommentare

jongste oudste gewildste
Daagop

Meer as die helfde van die miljoen geskrewe voorleggings is teen hierdie voorgestelde misdaad teen die mensdom, ons moet in groot getalle opdaag by die vergaderings.

Theunis Eloff

Die plekke in Limpopo is nie vir almal toeganklik nie. Dit is ook te ver van baie dorpe af. Dit is ń baie onregverdige proses. Daar waar hulle die vergaderings gaan hou is die grond of huiseienaars by verre in die minderheid. ONDEMOKRATIES.

willie

Ek is regtig negatief of hierdie “verhore” enige verskil gaan maak, hierdie regering gaan net alles stoomroller soos met vele ander besluite!

Ausie

Nou kan almal wat alewig so baie te sê het op dié blad hul stem dikmaak in n saal vol mense! Sterkte!

Jaco

En Bloemfontein???