Plaasaanvalle: ‘ANC verklaring is nie genoeg’

Ernst Roets, adjunk- uitvoerende hoof van AfriForum. Foto: Reint Dykema

Die burgerregte-organisasie AfriForum het Vrydag die ANC se verklaring verwelkom waarin die party plaasaanvalle veroordeel, maar gesê verklarings alleen is nie genoeg om die krisis in die praktyk hok te slaan nie.

Maroela Media het vroeër berig die ANC se onverwagse veroordeling van plaasmoorde staan in skrille kontras met pres. Cyril Ramaphosa se onlangse ontkenning van plaasaanvalle by die Verenigde Nasies in New York. Die regerende party het ook in dieselfde verklaring uitgevaar teen AfriForum en die organisasie daarvan beskuldig dat hy “blind is vir die swaarkry van plaaswerkers”.

Ernst Roets, adjunk- uitvoerende hoof van AfriForum, het dié aanval op AfriForum verwerp as oningeligte kritiek. “Die ANC beweer dat AfriForum blind is vir die situasie van plaaswerkers, terwyl AfriForum hom al telkemale daaroor uitgespreek het en ek selfs ’n hoofstuk in my boek Kill the Boer aan die verhouding tussen boere en plaaswerkers gewy het,” sê hy.

Roets het bygevoeg dat betroubare data oor uitsettings van plaaswerkers, waaroor die ANC goed mond uitgespoel het, yl gesaai is en het ’n beroep op die party gedoen om die data waarop sy kommer oor die mishandeling van werkers geskoei is te publiseer, sodat dit met die nodige erns hanteer kan word.

“Die beskikbare inligting maak dit egter duidelik dat die mishandeling van plaaswerkers beperk is tot geïsoleerde gevalle, terwyl plaasaanvalle en -moorde duidelik op ’n nasionale tendens neerkom. Albei moet veroordeel word, maar om voor te gee dat die omvang van die twee krisisse ewe groot is, is onverantwoordelik,” sê Roets.

Hy het bygevoeg hoewel AfriFourm die ANC se veroordeling van plaasaanvalle verwelkom, doen die organisasie opnuut ʼn beroep op die regering om plaasmoorde te prioritiseer deur ’n gefokusde teenstrategie op skrif te stel en uit te voer.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

32 Kommentare

jongste oudste gewildste
Johann cb

Die sogenaamde “verklaring”, is net ” gesigkoop” vir die 2019 verkiesing!

Al

Die ANC is met leuens besaai. Gesplete tonge.
Pleks dat hul persepsies en stereotipe uitlatings vir hulself hou.
Dis skokkend dat persepsies bestaan dat witmense ryk is.
Laat ANC vir ñ slag iets konkreet op tafel sit en nie argumente in lug gooi wat geen water dra nie

gatvol

Ek verwerp die ANC se selektiewe moraliteit met minagting.

FM

Afriforum praat oor plaasmoorde en nou kom die anc ewe skielik met plaaswerkersake. So eintlik wil die regering die rookskerm gebruik om plaasaanvalle te regverdig. So eintlik sê die anc ons veroordeel plaasmoorde, maar julle moet julle werkers beter behandel. Al weer n soort verskoning. Cyril moet nou die regeringsamptenaar reg help, want hy en Cyril verskil dan nou oor plaasmoorde. Wat my dronk slaan is dat vir elke fout wat die anc maak, voel hulle, MOET daar n verskoning wees al is dit hoe flou. Hulle erken hul foute, maar daar is altyd n …MAAR….. Erken julle maak droog… Lees meer »

leser

probeer die anc hulle skuld aan ander oordra
wys jou net watse twee gat jakkalse hulle is