Plaasmoord, aanval ruk landbougemeenskap

Ernst Human (Foto: Verskaf)

Kommer oor plaasaanvalle en -moorde heers Maandag opnuut nadat die vasgebinde liggaam van ’n bejaarde man oor die naweek op sy kleinhoewe buite Jan Kempdorp in die Noord-Kaap gevind is.

’n Oos-Kaapse gesin is ook oor die naweek in hul plaashuis aangeval terwyl ’n vrou verlede naweek byna op ’n plaas in die Vrystaat verkrag is.

Die 87-jarige Ernst Human se liggaam is Saterdag omstreeks 20:00 in sy studeerkamer op sy kleinhoewe net buite Jan Kempdorp aangetref. Sy hande en voete was vasgebind en hy het wonde aan sy bobene gehad.

Kapt. Sergio Kock, polisiewoordvoerder, sê Human het alleen gewoon ten tyde van die moord. ’n Familievriend het op sy liggaam afgekom en die polisie ontbied.

’n 46-jarige vrou is tans in aanhouding vir ondervraging.

Dr. Wynand Boshoff, provinsiale VF Plus-leier, sê Human was deel van ʼn plaasbeveiligingsgroep wat per radio met mekaar verbind is. Ander groeplede het ondersoek ingestel nadat hy nie op sy radioroep gereageer het nie.

“Hoewel plaasmoorde dikwels voorkom en die regering dit nie as prioriteitsmisdaad beskou nie, bly dit skokkend en onnodig.

“Die voorval beklemtoon opnuut die kwesbaarheid van mense op plase en in landelike gebiede, selfs binne veiligheidsgroepe.”

Kock sê dit is nie duidelik wat tydens die voorval gesteel is nie en speurders van die provinsiale ondersoekeenheid vir georganiseerde misdaad stel ondersoek in.

Enigiemand met inligting oor die moord kan sers. Stefaans Mangate by 060 963 6397 bel.

’n Gesin van die Oos-Kaap is ook Saterdagaand op hul plaas in die omgewing van Grahamstad aangeval.

Jason Kümm, landelike veiligheidsbestuurder van Agri Oos-Kaap, sê ses verdagtes, minstens drie van hulle gewapen, het Murray Crous en sy gesin in hul huis oorval. Die gesinslede is vasgebind voordat die aanvallers vuurwapens gebuit het.

Die aanvallers het te voet van die toneel gevlug voordat hulle na bewering later in ’n wegkommotor op die hoofpad gespring en weggejaag het.

Niemand is ernstig beseer in dié voorval nie.

Maroela Media het Maandagoggend ’n navraag aan die Oos-Kaapse polisie gerig omtrent dié voorval en wag steeds op terugvoer.

Poging tot verkragting op plaas

(Argieffoto: Anja van der Merwe)

Sers. Martin Xuma, polisiewoordvoerder, sê ’n 58-jarige vrou is verlede Sondag (6 Februarie) in haar huis op ’n plaas in die Smithfield-distrik byna verkrag.

Die vrou het gelê en slaap toe sy skielik iets bo-op haar gevoel het. “Sy het wakker geword en opgemerk dat ʼn jong man besig is om sy klere uit te trek. Sy het hom nie herken nie en het die verdagte weggestoot.”

Die jong man het daarna weggehardloop. Sy ma het egter verlede week opgemerk dat haar seun vreemd optree. Sy het hom daaroor uitgevra en die 17-jarige seun het erken dat hy die vrou probeer verkrag het.

’n Saak van verkragting is Woensdag by die polisie aanhangig gemaak en die tienerseun is in hegtenis geneem. Hy is intussen onder sy ouers se toesig vrygelaat en na ’n familielid op Smithfield gestuur.

Hy sou na verwagting vandag (Maandag) in die plaaslike landdroshof verskyn.

Die Xhariep-distrik se eenheid vir gesinsgeweld, kinderbeskerming en seksuele misdrywe stel in dié geval ondersoek in.

Dr. Theo de Jager, direksievoorsitter van die landbouorganisasie Saai, sê boere is elke dag bewus van die harde werklikheid van plaasaanvalle en -moorde. “Hul kinders en vroue se veiligheid is elke dag voorop in elke boer se gedagtes.”

De Jager verwys ook na pres. Cyril Ramaphosa se onlangse staatsrede waarin hy verskeie beloftes ten opsigte van veiligheid gemaak het, wat deur sommige as ’n “vars bries” bestempel is.

“En toe gebeur hierdie goed net weer die naweek. Dit help nie jy het die beste beleid en die mooiste beloftes, maar op die plase word boere steeds aangeval en vermoor nie,” sê De Jager.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

19 Kommentare

jongste oudste gewildste
Misky

So tragies en boere MOET 24 uur van die dag gewapen wees. Ek lei af die ma het die seun gaan aangee en dis verblydend om te weet sy doen die regte ding.

Witbaard

Nogsteeds is n groot hoeveelheid boere se plaashuise nie toegerus met die nodige vroeë waarskuwings meganismes nie, soos “motion lights” en “beams” wat geaktiveer is om alarm te maak, voordat die aanvallers die plaashuis binnedring nie. Die polisie en regering gaan ons nie beskerm nie. Ons sal dit SELF moet doen, anders word ons een vir een uitgehaal soos “sitting ducks”.

George

Ramaphosa kan nie minder omgee nie, dis sy maats wat dit doen

JM

Ramaphosa sal net omgee as die slagoffers deel van “our people” is.

Swerwer

So hartseer. Die Staatsrede word met ‘n knippie sout geneem. By die tyd word daar geweet dat daar nie op die ANC/Regering staatgemaak kan word vir enige hulp nie en nog minder kan geglo word wat uit hul monde kom.