Polisie vermis massa wapens en ammunisie

(Argieffoto: SAPD, Facebook)

Polisiebeamptes het die afgelope boekjaar 505 vuurwapens verloor of as gesteel aangemeld en honderde duisende rondtes ammunisie wat aan die polisie uitgereik is, word vermis, sê die minister van polisie, genl. Bheki Cele.

Hy het geantwoord op ʼn parlementêre vraag deur dr. Pieter Groenewald, leier van die VF Plus. Groenewald wou ook weet hoeveel van die wapens teruggevind is, hoeveel daarvan in misdade gebruik is en watter optrede daar teen skuldige polisielede was.

Cele het geantwoord dat 505 wapens in die afgelope boekjaar deur die polisie as gesteel of verlore aangemeld is. Hiervan is 43 tot dusver teruggevind. Dit is wel die laagste syfer vir verlore en gesteelde polisievuurwapens die afgelope vyf jaar. Die hoogste syfer van 785 verlore of gesteelde vuurwapens is in 2017/18 aangeteken.

In die afgelope boekjaar was die polisie die meeste vuurwapens kwyt in KwaZulu-Natal met 142, gevolg deur Gauteng met 101. Daarteenoor is net ses polisievuurwapens verloor of gesteel in die Noord-Kaap.

Skrikwekkend genoeg word meer as 550 000 rondtes ammunisie wat aan die polisie uitgereik is, vermis. Hiervan word meer as 433 000 rondtes vermis in Noordwes. Cele sê darem dit word ondersoek of die vorms in spesifiek Noordwes en die Oos-Kaap korrek ingevul is. Sowat 39 000 rondtes ammunisie is teruggevind.

In totaal is 41 van die vuurwapens wat verlede jaar deur die polisie verloor of by die polisie gesteel is, sedertdien in misdaad gebruik. In die vorige boekjaar is 26 lede van die polisie en 49 ander landsburgers suksesvol vervolg vir die steel van die polisie se wapens en ammunisie.

Cele het 18 veiligheidsmaatreëls aangekondig om die diefstal van vuurwapens en ammunisie te voorkom. Daaronder tel stafiekodes op elke vuurwapen, die aanbring van die polisie se embleem op elke vuurwapen, ʼn geïntegreerde ballistiese inligtingstelsel en gereelde oudits.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

44 Kommentare

jongste oudste gewildste
Werner

En dit is net die waarvan hulle weet

Johan

Daar word allerhande maatreëls aangekondig om die polisie se vuurwapens te identifiseer. Maar hulle het die belangrikste vergeet : deurlopende verantwoordbare toesig.

Ignatius

Die Polisie sal ons beskerm, want Denel sal aan hulle nuwe wapens en ammunisie verskaf ons is in veilige hande!!!!!

Lollie

Glad nie verbaas nie! As mens lees van al die korrupte polisielede wonder mens glad nie hoe so iets kan gebeur nie

Neels

Kan nie eers rekenskap gee van hulle eie vuurwapens nie dan wil Min Cele nog he ons moet ons vuurwapens inhandig . Benodig dit seker vir bende geweld , plaas aanvalle en om jag te maak op die vorige bedeling se sogenaamde bevoorregtes.