Prasa gee voorkeur aan Chinese bo Transnet

Eddie de Klerk, adjunk hoofsekretaris van die United National Transport Union (Untu) (Foto: LinkedIn)

Eddie de Klerk, adjunk hoofsekretaris van die United National Transport Union (Untu) (Foto: LinkedIn)

Die United National Transport Union (Untu) het Vrydag gesê hy is besorg oor die besluit deur die Passasierspooragentskap van Suid-Afrika (Prasa) om ʼn memorandum van verstandhouding te onderteken met China se Communications Construction Company, in plaas van met Transnet.

Die memorandum is onderteken sodat die maatskappy verskeie infrastruktuurontwikkelingsinsisiatiewe kan ondersoek, waaronder die Moloto-spoorontwikkelingskorridor.

Eddie de Klerk, adjunk hoofsekretaris van die vakbond, het gesê hulle neem kennis dat die regering uiteindelik reageer op versoeke van pendelaars om openbare vervoer te bevorder, aangesien die Moloto-pad algemeen beskryf word as “die pad van die dood” weens gereelde noodlottige ongelukke.

De Klerk het gesê Untu kan egter nie sien hoe ʼn ooreenkoms met ʼn Chinese maatskappy uitvoering kan gee aan die doelwitte van Suid-Afrika se Nasionale Ontwikkelingsplan nie.

“Untu het verskeie vrae waarom die Chinese genader is in plaas van Transnet, die spoorkenner in Suid-Afrika en wat ook as ʼn wêreldleier beskou word,” het hy gesê. “Die vakbond is van mening dat hierdie memorandum van verstandhouding om die Moloto-spoorontwikkelingskorridor in samewerking met die presidensiële Kommissie vir Infrastruktuursamewerking, onder leiding van die minister van ekonomiese ontwikkeling, Ebrahim Patel, gedoen moes word.”

De Klerk het gesê die vakbond eis dat die regering moet verduidelik of dié ooreenkoms met China volhoubare plaaslike poste sal verseker en die ontwikkeling van plaaslike vaardighede sal bevorder.

Dipuo Peters, minister van vervoer, het Donderdag gesê die Moloto-spoorontwikkelingskorridor is ʼn hoëprioriteitinisiatief weens verskeie uitdagings met openbare vervoer.

Sy het gesê die ingryping het ten doel om verskeie oplossings te ondersoek om kwessies soos beperkte ekonomiese ontwikkeling, toegang tot werksgeleenthede, buitensporige afstande wat pendelaars tussen hul huis en werk moet aflê en swak dienslewering op plaaslike paaie, aan te roer.

Volgens Prasa is die Moloto-projek se hoofdoelwit om passasierspoordiens te verseker as die ruggraat van ʼn geïntegreerde vervoerstelsel deur gebruik te maak van bewese, moderne tegnologie en toerusting.

Prasa het gesê die projek ter waarde van R30 miljard sal die spoed van busse van 70 km/h tot 120 km/h, en standaardtreine van 160 km/h tot 200 km/h verhoog, en die reistyd van pendelaars verminder.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

21 Kommentare

jongste oudste gewildste
pieter

70 tot 120. 160tot200.RSA SE SPOED NA ONDERGANG ONMEETBAAR.

John

Die bus bestuurders kan dan nie 60km per uur bestuur nie…wat n grap

Roland van der Neut

Mooi nou het hulle nog meer wat hulle kan brand en plunder

Nita

Ek hoop ek leef lank genoeg om die Train Smash te sien. Al wie hier gaan voordeel kry, is nog duisende Chinese wat n vastrapplekkie gaan kry in SA. Ek hou glad nie asem op, om ooit n voltooide, suksesvolle projek te sien nie.

Ken van

Uit persoonlike ervaring het ek ervaar dat Transnet nie baie eties tewerk gaan nie en ek sal ook nie weer met hulle wil besigheid doen nie.