Ramaphosa sê grondeise verander derduisende lewens   

Pres. Cyril Ramaphosa. Foto: Elmond Jiyane, GCIS

Ten spyte van die talle probleme het die proses van grondeise ʼn verskil gemaak in die lewens van honderde duisende Suid-Afrikaners wat van hul geboortereg ontneem is, het pres. Cyril Ramaphosa Saterdag gesê.

Volgens Ramaphosa moet die grondhervormingproses egter versnel word om die historiese onreg te herstel. Die president het titelaktes aan die families Ebenhaeser, Paternoster en Beeswater oorhandig. Die titelaktes is vir 2 990 ha se kommersiële plaasgrond.

Ramaphosa het gesê die oorhandiging van dié titelaktes is ʼn geskiedkundige gebeurtenis aangesien dit die eerste afgehandelde grondeis in die Wes-Kaap is vir afstammelinge van die Griekwa-gemeenskap.

“Hoewel menseregte volgens hul aard universeel is, is dit die regte van die samelewing se kwesbaarste wat veral gehandhaaf en beskerm word. Plaaswerkers en arbeidshuurders op plase is die lewensbloed van ons land. Dit is jou hande en jou arbeid wat kos op ons tafels sit. Sonder julle daaglikse pogings sou al die plase reg oor die land nie die landbouprodukte waarvoor ons land wêreldwyd bekend is, kan vervaardig, verkoop en uitvoer nie,” het Ramaphosa gesê.

Volgens Ramaphosa kon die skewe patrone van grondbesit in die land die afgelope 25 jaar reggetrek word danksy wetgewing. “Oor die lengte en breedte van Suid-Afrika is grond aan die oorspronklike eienaars terugbesorg. In ander gevalle waar dit nie moontlik was om grond terug te gee nie, is individue of gemeenskappe finansieel vergoed.”

ʼn Interministeriële komitee is aangestel om toesig te hou oor die versnelde grondhervormingsproses, met ʼn presidensiële adviespaneel wat die komitee bystaan in sy werk.

“Om grond aan die regmatige eienaars terug te besorg is net die eerste stap na volhoubare en volgehoue grondhervorming. Dit is ʼn prioriteit van hierdie regering om te verseker dat ons die nodige ondersteuning bied aan gemeenskappe wat hul grond teruggekry het om dit produktief en effektief te benut en om ons breër doelwitte van landbougroei en ekonomiese transformasie te ondersteun.”

Ramaphosa het gesê die regering se versnelde grondhervormingsprogram is noodsaaklik om die ongeregtighede van die verlede reg te stel, maar is ook in belang van maatskaplike samehorigheid en harmonie tussen die verskillende rassegroepe in die land

 

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

53 Kommentare

jongste oudste gewildste
Andreas
Andreas
Ronel

Nes die plaas in die Vrystaat net anderkant Kroonstad, wat 6 jaar aan n grondeis toegstaan is. Dit WAS n baie groot, suksesvolle plaas gewees. Daars is absoluut niks van daai plaas oor nie. Nie eers n stukkie draad nie

Isabel

Wie probeer hy ʼn rat voor die oë draai

Johan

Ek hou nie van die woorde “sonder vergoeding ” nie. Ervare boere se lewensbron kan hulle ontneem word. Dit is pleinweg net onbillik.
En stel maar die soveelste kommissie van ondersoek aan om vas te stel waarom so baie opkomende boere nie altyd suksesvol is nie…