‘Rassistiese aanvalle’ op Dlamini-Zuma veroordeel

Nkosazana Dlamini-Zuma, minister van samewerkende regering en tradisionele sake. (Foto: GCIS)

Die parlementêre portefeuljekomitee oor samewerkende regering en tradisionele sake en die ANC het die rassistiese aanvalle op minister Nkosazana Dlamini-Zuma ten sterkte veroordeel.

Dlamini-Zuma was die afgelope ruk erg in die spervuur, veral oor die voortgesette verbod op die verkoop van tabakprodukte op vlak 4 én 3 van die afsonderingsregulasies.

ʼn Herrie het nou boonop losgebars nadat Danie Herselman ʼn neerhalende foto van Dlamini-Zuma op Facebook in antwoord op ʼn ander sosialemediagebruiker se inskrywing geplaas het. In die plasing vergelyk Herselman vir Dlamini-Zuma met ʼn dier.

“Die plasing is vernederend, neerhalend en rassisties. Dit is ondenkbaar dat ʼn rasionele mens iets kan skryf en in die openbare domein plaas sonder om te dink oor die gevolge en die skade wat dit aan die minister en haar gesin gaan doen,” het komiteevoorsitter Faith Muthambi gesê.

Muthambi sê die komitee hoop Herselman word voor stok gekry. “Rassisme moet stop. Ons kan nie sulke misbruike toelaat om plaas te vind nie.”

Sy sê Suid-Afrikaners het die reg op vryheid van spraak om te sê of te skryf wat hulle wil. Maar dat dié reg nie iemand anders se regte mag skend of enige wetgewing mag oortree nie. Die komitee het ook sy steun aan Dlamini-Zuma toegesê en gevra dat die polisie en die Menseregtekommissie die voorval ondersoek.

Die ANC-koukus het ook gevra dat ongevraagde en rassistiese aanvalle op Dlamini-Zuma gestaak word. Die ANC voer aan daar is ʼn georkestreerde veldtog in die media en op sosiale media om die werk wat Dlamini-Zuma doen te ondermyn.

ANC-hoofsweep Pemmy Majodina sê soortgelyke aanvalle is teen Dlamini-Zuma in haar voormalige amp as minister van gesondheid op tou gesit toe sy tabakgroepe en farmaseutiese maatskappye die stryd aangesê het terwyl die gesondheidsektor “geradikaliseer” is.

Majodina sê dit was danksy Dlamini-Zuma se werk dat Suid-Afrika nou in ʼn beter posisie is om die Covid-19-pandemie te hanteer.

Die ANC het ook gevra dat die voorval ingevolge wetgewing oor haatspraak en rassisme ondersoek word.

“Ons gaan geen steen onaangeroer laat nie om te verseker diegene soos Danie Herselman en sy kranksinnige soort dra die gevolge van hulle bose dade.”

Ook op sosialemediaplatforms het talle gebruikers gevra dat Herselman strafregtelik vervolg word.

Die MRK het bevestig dat hy ʼn formele klagte oor die voorval van die Suid-Afrikaanse Raad van Kerke ontvang het.

Herselman se profiel is nie meer op Facebook nie, hoewel skermgrepe van die plasing reeds wyd versprei is.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

76 Kommentare

jongste oudste gewildste
Pieter

Wat werk sy asb dit is seker n grap. Watse dokter is sy om mense se sigarette net weg te vat en geen ondersteuning gee nie. Wie is sy om namens my te besluit wat ek mag en nie mag nie. En dan lieg sy nog in haar hofstukke en oor zottie die hele ANC is n sirkus

SomeOne

wanneer gaan malema ook sy dag kry vir neerhalende rassistiese woorde teenoor wit afrikaners ?

Adriaan

Beskuldigings van rassisme is die ANC se verskoning van laaste uitweg.

Magda

Net soos die RASSISTIESE AANVALLE OP BLANKE ONDERNEMINGS MET HULP VAN DIE REGERING – SO WHAT GOES AROUND COME AROUND – FIRE HER

Barbara

okay Rasisme moet stop. Nou hoekom is die fonds vir besighede dan rasisties. wat geld vir een geld vir almal.