Regering, nié burgers, is ‘roekeloos, onverantwoordelik’

Pres. Cyril Ramaphosa tydens Woensdagaand se toespraak. (Foto: Kopane Tlape/GCIS)

Terwyl pres. Cyril Ramaphosa Woensdagaand gemaan het dat talle Suid-Afrikaners oënskynlik vergeet dat die Covid-19-pandemie steeds nie iets van die verlede is nie, sê die DA en die VF Plus die ramptoestand moes opgehef word.

Daar was die afgelope ruk heelwat bespiegeling én vrese oor die kwessie of Suid-Afrika weer na ʼn strenger vlak van inperking geskuif sou word. Dit het nie gisteraand ʼn werklikheid geword nie, maar Ramaphosa het wel aangekondig dat die ramptoestand met nog ʼn maand verleng is.

Die president het weer eens ʼn beroep op mense gedoen om maskers te dra, om sosiale afstand te handhaaf en om gereeld hande te was of te ontsmet.

“Om ʼn masker te dra elke keer wat ons die huis verlaat, is veel, veel beter as ʼn tweede vlaag. Dit is ook veel beter as ʼn terugkeer na [strenger] afsondering en beter as om die ekonomie te sluit,” het die president gewaarsku.

Dr. Pieter Groenewald, leier van die VF Plus, het in reaksie op Ramaphosa se aankondiging gesê die afsonderingstyd moes heeltemal opgeskort word in die lig van die land se sukkelende ekonomie wat dit nie langer kan bekostig nie.

“Die president het self erken dat sekere segmente van die sakesektor nog nie ten volle kan funksioneer met die bestaande inperkings nie en dit kan nie langer uitgerek word nie,” het Groenewald gesê.

“Daar is weer eens talle onduidelikhede oor presies wat die president se aankondiging bepaal en daar sal gewag moet word vir die publisering van die regulasies om duidelikheid hieroor te kry. Een voorbeeld is die aandklokreël. Dit is nie seker of dit steeds van krag is nie. Die president het wel gesê die sake-ure vir drankverkope is terug na normaal, maar daar is nog onsekerheid oor ander bedrywe.

“Wat die toerismebedryf betref is aangekondig dat internasionale vlugte weer toegelaat sal word, maar dit is onduidelik of daar enige beperkings gaan wees soos die toelating van mense uit lande met ’n hoë voorkoms van Covid-19.”

Groenewald het die verlenging van die betaling van toelae deur die Werkloosheidsversekeringsfonds (WVF) se ramphulpfonds (Ters) verwelkom en sê dit is veral nodig vir die gastebedryf wat nog nie ten volle kan funksioneer nie. “Dié fonds dra daartoe by dat werkers nie in groot getalle afgelê word nie.”

John Steenhuisen, leier van die DA, het op sy beurt die verdere verlenging van die ramptoestand as onbegryplik bestempel. “Die regering kan nie Suid-Afrika aanhou bestuur rondom ʼn enkele gevaar nie terwyl ons land in soveel gevaar is weens veel groter risiko’s soos armoede, hongersnood en werkloosheid.

“Ons verwerp met minagting die bedekte bedreiging van ʼn terugkeer na hoë vlakke van afsondering.”

Steenhuisen sê mense moet vryheid en vertroue gegee word om die ekonomie en hul lewe te herbou.

“Die ramptoestand op sigself was rampspoedig en het nie net korrupsie aangevuur nie, maar ook onwettige grondbesettings en wetteloosheid.”

Steenhuisen sê die regering moet regulasies vir ʼn sogenaamde nuwe normaal in werking stel sodat die ramptoestand opgehef kan word.

“Die ramptoestand, die voortgesette afsondering en die bedreiging van ʼn strenger inperking wat steeds oor Suid-Afrika hang, gaan ons ekonomiese herstel groot skade berokken. Die enigste manier om werksgeleenthede en belasting te laat groei, is deur belegging in produktiewe ondernemings.

“Ons herhaal ons oproep aan die regering om die afsondering en die ramptoestand te beëindig, grense oop te stel, die aandklokreël op te hef en Suid-Afrika toe te laat om terug te keer na normale ekonomiese bedrywighede. Die moontlikheid van enige verdere inperkings moet onomwonde verwerp word,” het hy gesê.

“Ramaphosa se kabinet beskuldig Suid-Afrikaners daarvan hulle ‘roekeloos en onverantwoordelik optree, asof Covid-19 nie meer bestaan nie’. Mense besef Covid-19 bestaan, maar hulle besef dit bestaan tesame met talle ander gevare. Hulle weet dié gevare is veel erger, insluitend die gevaar van afsondering wat gewys het dit is veel meer dodelik as Covid-19 in laerinkomstelande weens die uitwerking op armoede, honger, werkloosheid, gesinsgeweld en openbare gesondheid in die algemeen.

“Veel eerder as wat dit roekeloos en onverantwoordelik is, maak die pogings van miljoene Suid-Afrikaners om terug te keer na normale ekonomiese bedrywigheid heeltemal sin,” het Steenhuisen gesê.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

26 Kommentare

jongste oudste gewildste
Dirk Mostert

Die tussenverkiesing-stembriewe is nog nie koud nie, toe verleng hy die ramptoestand met verlaging na vlak 0.9

Persheks Adri

Hy’t met ‘n maand verleng sodat hulle verder kan plunder en nog meer armoede en werkloosheid kan veroorsaak om nie eers te praat van die moord en dood elke dag nie. Glad nie van belangrike goed gepraat nie pffft

Jaco

“Groenewald het die verlenging van die betaling van toelae deur die Werkloosheidsversekeringsfonds (WVF) se ramphulpfonds (Ters) verwelkom en sê dit is veral nodig vir die gastebedryf wat nog nie ten volle kan funksioneer nie. “Dié fonds dra daartoe by dat werkers nie in groot getalle afgelê word nie.” Onthou tog dat dié uitbetalings NET gedoen word aan besighede in die gastebedryf wat 100% BEE en 100% regstellende aksie is. Wat ek egter graag wil weet is, as ek as ‘n wit man ‘n klein gastehuis as 1 man saak bedryf en ek dus nie vir dié hulpfonds kwalifiseer nie, dan… Lees meer »

Anel

Hy weet self nie hoe om hierdie te hanteer nie, nou kyk hy maar wat die engelse doen. Pateties. Hy hoe aan geld uit deel, wat hy waar kry? Laat almal terugkeer werk toe, maak die ekonomie oop. Daar gaan meer mense dood van honger en verwante oorsake as die virus. Mense kan maar doodgaan van die honger, solank hulle net nie die virus het nie. Ag kom by man. Ons us nie kinders nie. As jy so bang is, doen afstand van jou amp en gaan kruip weg onder ‘n klip. Genoeg is genoeg!!! Gaan haal jou komunistiese idilogiee… Lees meer »

Derek

Die ANC kan nie eens met al die wette wat ingebring is hul mense beheer nie. Die misdaad vertel die waarheid en natuurlik sal hul volgelinge die voorbeeld volg van die leiers, die EFF maar net in n huwelik met die ANC. Dit blyk dat die EFF maar net n naamsverandering ondergaan het, van die jeugliga van die ANC tot EFF. Die ANC volg die EFF in alles wat hul voorstel, want hulle weet hul toevlug is eintlik gesetel in die EFF, met die hoop dat die EFF sal regeer. n Hoop wat nooit sal realiseer nie, want die EFF,… Lees meer »