RGB weier om Afrikaanse student te registreer

Du Toit Genis (Foto: Verskaf)

ʼn Sielkundestudent het met behulp van die burgerregteorganisasie AfriForum met ’n regsgeding teen die Raad vir Gesondheidsberoepe van Suid-Afrika (RGB) begin om te verseker dat sy aansoek om registrasie by dié raad oorweeg word. Tans weier die raad om die aansoek af te handel omdat sy honneursgraadsertifikaat in Afrikaans is.

Du Toit Genis (29) is tans besig met sy meestersgraad in sielkunde aan die Universiteit van Johannesburg (UJ).

Ten einde sy studies te kan voltooi, moet hy by die raad as sielkunde-intern registreer. As deel van die vereistes moet hy die sertifikaat wat bevestig dat hy in 2018 ’n honneursgraad aan die Universiteit van Pretoria behaal het, indien.

Genis sit nou met sy hande in die hare, want sonder die registrasie kan sy professionele loopbaan as sielkundige nie afskop nie.

Die regsproses teen die raad gaan ook tyd neem, wat beteken dat hy nie begin volgende jaar as sielkundige die privaatpraktyk kan betree nie. Dus sal hy ook sonder ʼn inkomste sit.

“Ek studeer al reeds vir tien jaar en wil die proses nou klaarmaak dat my lewe kan aangaan,” sê Genis.

Genis het in Desember verlede jaar sy honneurssertifikaat by die raad ingehandig. ’n Verteenwoordiger van die raad het hom per e-pos in kennis gestel dat die registrasieproses nie kan voortgaan nie, aangesien die sertifikaat in Afrikaans is. Sy vertoë dat sy akademiese rekords wat hy ook ingedien het, volledig in Engels beskikbaar is, het op dowe ore geval.

Genis het aanvullende uitgawes aangegaan om die sertifikaat te laat vertaal en ook ʼn amptelike brief van die universiteit gekry wat dié vertaling erken.

“Volgens die raad was dit egter steeds onvoldoende.”

Die raad se lys van vereiste dokumentasie het geen melding van die taalvoorkeur gemaak nie. “Toe ek die verteenwoordiger by die raad vra om vir my dokumentasie te stuur wat dit duidelik uitstip dat die sertifikaat in Engels moet wees, het sy geweier.”

Genis sê hy het met ʼn oudlid van die raad oor die probleem gepraat en volgens dié persoon het só iets nog nooit vantevore gebeur nie.

“Hoe ver sy kennis ook strek, kan jy ʼn sertifikaat inhandig indien dit in ʼn erkende Suid-Afrikaanse taal is. En Afrikaans ís ʼn erkende taal. In die geval waar dit nié ʼn erkende taal in die land is nie, vereis die raad slegs dat die betrokke universiteit ʼn brief van erkenning inhandig.”

Genis het AfriForum in Desember oor die saak genader en teen Januarie het ʼn regsverteenwoordiger van Hurter Spies Ingelyf aan die raad ʼn dringende skrywe gerig, maar dié het geen resultate opgelewer nie en ’n semi-dringende aansoek is nou teen die raad ingedien.

Volgens Alana Bailey, AfriForum se hoof van kultuursake, is dit uiters diskriminerend om ’n graadsertifikaat wat in een van die land se amptelike tale is, te weier en van ’n student te verwag om uitgawes aan te gaan om dit te laat vertaal.

“Hierdie besluit raak elke student wat al ’n kwalifikasie aan ’n Afrikaanstalige instelling behaal het, of nog gaan behaal. Daarom moet sterk aksie geneem word teen hierdie burokratiese minagting en diskriminasie waaraan Genis onderwerp word,” sê Baily.

“Ons vertrou dat die saak spoedig afgehandel sal word sodat hy sy loopbaan kan voortsit en ander instellings afgeskrik word daarvan om applikante se taalregte te skend.”

Enige ander persoon wat soortgelyke diskriminasie ervaar kan AfriForum kontak by [email protected].