SA se werkloosheidskoers hoogste in jare

(Foto: pixabay)

Statistieke Suid-Afrika (StatsSA) sê Suid-Afrika se werkloosheidskoers het in die derde kwartaal tot 29,1% geklim.

Dit is die hoogste syfer in 11 jaar en ʼn effense styging van die vorige kwartaal se 29%.

Die getal werklose Suid-Afrikaners staan nou op 6,7 miljoen, in vergelyking met 4,5 miljoen gedurende dieselfde tydperk ʼn dekade gelede.

Altesaam 62 000 mense is in die derde kwartaal in diens geneem.

In die formele sektor is 43 000 mense in diens geneem, landbou se indiensnemingsyfer het met 38 000 gestyg, werksgeleenthede in private huishoudings is 35 000 meer, maar die informele sektor het 53 000 werksgeleenthede verloor.

Swart vroue is steeds die kwesbaarste groep, met 30% van hulle wat werkloos is. Dié groep word gevolg deur bruin mense, van wie 23,7% werkloos is en Indiërs, van wie 18,2% werkloos is.

Nagenoeg 3,3 miljoen (32,3%) van jong mense tussen 15 en 24 jaar oud werk nie en ontvang ook nie enige verdere opleiding of onderrig nie. Vroue in dié groep sukkel selfs meer om werk te kry as hul manlike eweknieë.

Altesaam 9,9% van diegene tussen 55 en 64 jaar oud is werkloos, in vergelyking met die 58,2% van Suid-Afrikaners tussen 15 en 24 jaar oud wat óók werkloos is.

Die uitgebreide werkloosheidskoers, wat diegene insluit wat moed opgegee het met die werksoek-proses, is volgens StatsSA onveranderd op 38,5%.

Wat provinsiale syfers betref, is die grootste toename in werksgeleenthede in KwaZulu-Natal (+39 000), die Vrystaat (+21 000) en die Oos-Kaap (+13 000) aangeteken. Die provinsies waar ʼn daling aangeteken is, is Limpopo (-42 000), Noordwes (-19 000) en Gauteng (-17 000). Die syfer in die Wes-Kaap is onveranderd.

Die Oos-Kaap het die hoogste uitgebreide werkloosheidsyfer. Dit staan op 46,5%, oftewel 1,2 miljoen mense. Dit is 37 000 meer as verlede jaar.

Bobby Stevenson, die DA se hoofsweep in die Oos-Kaapse wetgewer, het in reaksie op StatsSA se jongste syfers gesê werkloosheid in dié provinsie saai verwoesting onder gesinne wat sukkel om kos op die tafel te sit.

Volgens hom het Oscar Mabuyane, Oos-Kaapse premier, geen oplossing vir die immer stygende werkloosheidsyfer nie.

“Mense verlaat die provinsie op strepe en gaan soek na geleenthede in ander provinsies. Dit moenie nodig wees vir mense om hul huise agter te laat om ʼn inkomste te verdien nie,” het Stevenson gesê.

“Hulle moet die geleentheid gegun word om hul lewens te bou, hul kinders groot te maak en te bly in die provinsie waar hulle gebore is. Matrikulante moet uitsien na ʼn toekoms van hoop, nie radeloosheid nie.”

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

25 Kommentare

jongste oudste gewildste
KP

Wat n klug!!!!!

Judge Dredd

Die mier en die springkaan.

Lees dit.
Verstaan dit.
Hou op om soos die sprinkaan te maak / vir partye te stem wat soos die sprinkaan maak.

Emma

Hey geweet werkloosheid syfers al die hoogte in gaan en nog gaan sonder werk sit. Anc maak net arbeids reels soos dit hulle pas en dink nie aan die gevolge nie. Dan soek die ontvanger geld en nogtans geld vir die staat se uitgawes wat sal halveer met die werkloosheid wat net al meer en meer raak.

Dafer

Bull!

Francois le Cochon

Ryk mense skep werk. Hoe meer ryk mense ons land verlaat, hoe minder werksgeleenthede is daar, So eenvoudig soos dit.