Deur Jhua-Nine Wyrley-Birch
Thinus van der Westhuizen, ‘n Suid-Afrikaanse Michelin-ster-sjef, se restaurant, die 99 Sushi Bar in Abu Dhabi, spog vir ʼn tweede jaar met smullende Michelin-sterstatus.
Dié gesogte Japannese restaurant, waarvan Van der Westhuizen die afgelope agt jaar die hoofsjefhoed dra, is vanjaar met een Michelin-ster bekroon.
Van der Westhuizen het verlede jaar by Jan-Hendrik van der Westhuizen, Connor Toomey en Jean Delport aangesluit as een van slegs vier Suid-Afrikaanse sjefs wat al met dié status bekroon is.
Van der Westhuizen, ʼn Pretoria-gebore sjef, het voorheen aan Maroela Media gesê dat 99 glo dat “elke liewe maaltyd voorberei moet word asof dit vir ʼn Michelin-inspekteur bedien gaan word.”
Volgens die 34-jarige is dít wat hy en sy span as die norm in hul restaurant beskou, goed genoeg is om die “wêreldbeker-trofee van kookkuns omhoog te hou”.
Die Michelin-gids is ʼn reeks uiters goed nagevorste gidse wat sedert 1900 deur die Franse Michelin-bandemaatskappy uitgegee word.
Tot drie Michelin-sterre kan toegeken word vir uitnemendheid.
Dit is slegs die tweede jaar wat restaurante in die Midde-Ooste in die Michelin-stergids opgeneem word.
“Dit is ʼn eer vir die 99-span om in 2023 met een Michelin-ster bekroon te word. Met hierdie groot erkenning het ons ook ʼn groot verantwoordelikheid: ons plig om onsself te handhaaf in die sterrewedloop na die gastronomiese hemele,” het Jaime Castaneda, uitvoerende hoof van 99 SB Investment, in ʼn Facebook-plasing oor die restaurant se prestasie gesê.
Volgens Castaneda gaan dié restaurant ook uitbrei en takke in onder meer Londen en Monaco open.