Sewe aangekeer oor diefstal by Limpopo-skole

Foto verskaf deur SAPD Limpopo

Sewe verdagtes is Sondagaand in Limpopo in hegtenis geneem op aanklag dat hulle by skole en residensiële geboue ingebreek het.

Brig. Motlafela Mojapelo, woordvoerder van die polisie, het gesê die polisie het inligting ontvang oor die verdagtes en ʼn operasie in Sebayeng uitgevoer. Dit het tot die inhegtenisneming gelei van die eerste twee verdagtes. “Hulle het items in hul besit gehad wat vermoedelik van een van die skole in die gebied gesteel is,” het hy gesê.

ʼn Gesamentlike taakspan en speurders van Mankweng se ondersoek daartoe gelei dat nog vyf persone op verskillende plekke in hegtenis geneem is. “Dié persone word ook daarvan beskuldig dat hulle vermoedelik gesteelde eiendom in hul besit gehad het.”

Die sewe verdagtes, tussen 24 en 64 jaar oud, word na bewering met verskeie rooftogte in die gebied verbind. Tydens die inhegtenisneming het beamptes onder andere beslag gelê op sentrale verwerkingseenhede (SVE’s), rekenaarskerms, sleutelborde, ʼn luidspreker, ʼn boor, ʼn slypmasjien, ʼn koevoet, twee yskaste, beddens en ʼn plasma-TV.

“ʼn Ondersoek sal ook bepaal of die verdagtes met enige ander misdade in die provinsie verbind kan word,” het Mojapelo bygevoeg. “Hulle sal na verwagting Dinsdag in die Mankweng-landdroshof verskyn op aanklag van sakeroof en die besit van vermoedelik gesteelde eiendom.”