Shivambu wel op aanrandingsklag vervolg

‘n Skermskoot uit die video.

Floyd Shivambu, onderleier van die EFF, gaan wel op ’n klag van aanranding verhoor word.

Shivambu word daarvan aangekla dat hy ’n joernalis van Netwerk24, Adrian de Kock, in Maart 2018 buite die parlement aangerand het nadat De Kock ʼn vraag aan hom wou stel en foto’s wou neem.

Shivambu se regspan het vertoë vir moontlike mediasie en afwenteling aan die Nasionale Vervolgingsgesag (NVG) gerig, maar dit was onsuksesvol. Volgens die NVG sal Shivambu se verhoor op 11 Februarie 2021 begin.

De Kock het saam met ander joernaliste buite die parlement gewag op nuus oor die DA se tugverhoor teen Patricia de Lille. Shivambu en nog ander mans het daar aangekom en gevra vir watter saak hulle daar is. Volgens De Kock het Shivambu en die ander mans skielik geëis dat hy die foto wat hy van hulle geneem het, moet verwyder. Hulle het sy toerusting probeer gryp en hom rondgepluk. Ander joernaliste het die onderonsie afgeneem.

Shivambu het kort daarna om verskoning gevra vir die “onderonsie”. Shivambu het gesê De Kock het foto’s van hom geneem en daarop aangedring om met hom te praat terwyl hy dokumente ontvang het wat met ʼn vergadering van die parlementêre staande komitee oor finansies verband hou. Hy het nie besef hy is ʼn verslaggewer nie, het Shivambu verduidelik.

“Ek was haastig om by die komiteevergadering uit te kom, en ek aanvaar dat my ongeduld met die man onvanpas was,” het Shivambu bygevoeg. “Daar was ʼn onderonsie; dit was glad nie ʼn aanval op die joernalis of mediavryheid nie. Ek is jammer oor die voorval en glo dit moes anders hanteer geword het. Ek aanvaar volle verantwoordelikheid en vra om verskoning dat ek in ʼn onderonsie betrokke geraak het met ʼn persoon wat ek later uitgevind het, is ʼn joernalis. Ek sal skriftelik ʼn amptelike verskoning aanstuur, want ek glo dit moes nie gebeur het nie,” het hy destyds gesê.

Die voorval is wyd veroordeel.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

16 Kommentare

jongste oudste gewildste
Theo

“Hy het glad nie geweet hy is n verslaggewer nie” regverdig hy hier die daad van aanranding? Is dit okay om enige iemand so te hanteer solank hy nie n verslaggewer is nie? wat het dit met die kruks van die saak inelkgeval te doen? Verslaggewer al dan nie jy hanteer nie enige iemand so nie en aanranding bly aanranding Shivambo…

Deon

Nie besef hy is n joernalis nie??? Mmm, so maw as dit nie n joernalis was nie dan dink hy dat hy die reg het om aan andsr te slaan?

Willem

Sorry dink hulle laat hul wegkom met alles

Anel

Natuurlik het hy geweet die man is ‘n verslaggewer. Verslaggwers het gewoonlik sigbare identifikasie. Verder het hy’ n kamera by hom gehad. Hy het ook geen verskoning om sommer iemand net aan te rand nie. As dit nou omgekeerd was, het die land seker gebrand. Shivambu, jy was verkeer. Hou op appelleer en vat jou pak.

Persheks Adri

Onaanvaarbare gedrag van die petters! Jammer werk nie vir jou gedrag nie! Jy moet maniere kry in die 1ste plek pfffft!!!