Skerp verhoging in brandstofpryse vir Mei bevestig

Argieffoto (Foto: Activ-Michoko, Pixabay)

Die minister van energie, Jeff Radebe, het Donderdag die petrolprysaanpassings vir Mei 2018 bevestig.

Die departement het in ʼn verklaring gesê die prys van brandstof styg weens die Rand/Dollar-wisselkoers (van R11.85 tot R11.95 per dollar) en die styging in die prys van ru-olie (van $65.71 tot $70.36 per vaatjie). Die internasionale pryse van petroleumprodukte het ook verhoog.

Op 2 Mei 2018 sal petrol met 49c per liter duurder wees; diesel met ʼn swaelinhoud van 0.05% styg met 59c per liter en diesel met ʼn swaelinhoud van 0.005% met 58c per liter. Paraffien styg met 52c per liter en LPGas met 70c per kilogram.