Skoolseuns in hof wat moord op video vasvang

Thoriso Themane (Foto: ANA)

Vyf skoolseuns sal Donderdag in die Polokwane-landdroshof verskyn in verband met die gru-moord op die plaaslike musikant Thoriso Themane.

Themane (27) is Saterdagaand in die Flora‑park op dié dorp aangerand waarna hy vir dood agtergelaat is. Themane was glo op pad huis toe van ʼn musiekoefening by sy kerk toe hy deur die groep seuns oorval en aangerand is.

Volgens die polisie is Themane Sondag gevind en na ’n hospitaal geneem waar hy aan sy beserings beswyk het.

Die skoolseuns, almal tussen die ouderdomme van 15 en 16, is Woensdag in hegtenis geneem nadat video’s van dié moord, wat die seuns self opgeneem het, wyd op sosiale media versprei is.

Een van dié video’s wys hoe ʼn bebloede Themane gesleep, geslaan en geskop word. ʼn Ander wys hoe Themane se oënskynlik lewelose liggaam straat af gesleep word.

’n Derde video wys hoe een van die seuns, geklee in ’n skooluniform, oor die moord spog waarna hy beweer dat niks met hom sal gebeur nie, aangesien sy pa glo onaantasbaar is. Dié seun se pa is ’n afgetrede polisiebeampte.

Themane se dood het skokgolwe deur die land gestuur. Genl. Khehla Sitole, nasionale polisiekommissaris, het die moord op Thmane veroordeel en gemeenskappe aangeraai om eerder nou met die polisie saam te werk as om die gereg in eie hande te neem.

ʼn Aanlyn petisie doen sedert Maandag die ronde wat eis dat geregtigheid in dié moordsaak moet geskied. Die petisie het teen Donderdagoggend meer as 53 000 handtekeninge gehad.

Themane se pa, ’n pastoor, het aan die TV-nuuskanaal eNCA gesê sy seun was ’n meelewende jong man wat lief was vir musiek.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

61 Kommentare

jongste oudste gewildste
Elize Nel

Dis sinneloos – so onnodig. Ek hoop die vyf seuns kry wat hulle toekom en baie sterkte vir die familie van die oorledene.

monique

Nou wonder ek daar was 7 gewees waar is die ander twee?
Die jongste was 13 gewees

Juffrou

En nou wil Lesufi sulke moordenaars in ons Afrikaanse skole loslaat!?
Behoede ons.

Sê maar net 1

Give power to the youth. Kyk die gevolge. Een van die talle.
Die sg jeug wat ‘power’ het ken nie hul plek in die samelewing nie. (Seker ook nie in die huis nie).
Wetgewing verban mos enige vorm van dissiplinering behalwe mooi praat.

Jepetto

Geregtigheid moet nou plaasvind