Staatsdiens: Regstellende aksie moet nou opgeskort word

Argieffoto

Argieffoto

Die staatsdiens het sy regstellendeaksie-teikens bereik en bekwame Suid-Afrikaners van alle rasse kan nou aansoek doen om poste op alle vlakke, het Rapport Sondag berig.

Richard Sizani, waarnemende voorsitter van die Staatsdienskommissie (SDK), het met die Sondagkoerant gepraat ná sy toespraak by SDK-kongres in Centurion. Volgens die koerant ondersteun premiers in die provinsies dié stelling. Klik hier om meer te lees.

Intussen het Dirk Hermann, bestuurshoof van Solidariteit, Sondag aan Maroela Media gesê in die lig van die vlakke van verteenwoordiging in die staatsdiens moet regstellende aksie opgeskort word en meriete aanstellings moet gedoen word.

“Meriete aanstellings is ook noodsaaklik om die staatsdiens te transformeer in ʼn doeltreffende instelling soos vereis deur die Grondwet van Suid-Afrika,” het Hermann gesê. “Die oordrewe rasbenadering die afgelope jare het tot gevolg gehad dat rasseverteenwoordiging bereik is, maar ten koste van ʼn doeltreffende staatdiens.” Hy meen die staat het nie daarin geslaag om ʼn balans tussen die verskillende grondwetlike regte en pligte te vind nie. “Miljoene gewone Suid-Afrikaners, meeste uit arm benadeelde gebiede moes die prys van rassetransformasie betaal.”

Hermann het bygevoeg alhoewel die rigting reg is, is dit nie voldoende om bloot terloops te sê wittes kan weer aansoek doen nie. “ʼn Meer omvattende aanbeveling moet gedoen word,” het hy gesê.

In die lig daarvan stel Solidariteit die volgende 10-punt plan aan die Staatsdienskommissie voor:

  1. Dat ʼn formele aanbeveling vir die opskorting van regstellende aksie in die staatsdiens deur die Staatsdienskommissie gemaak word.
  2. Dat die fokus skuif van rasseverteenwoordiging tot ʼn effektiewe staatsdiens, soos vereis in die Grondwet.
  3. Dat meriete die oorwegende faktor by aanstellings en bevorderings word.
  4. Dat minderhede aangemoedig word om weer met vrymoedigheid aansoek te doen vir poste in die staatsdiens.
  5. Dat minderhede ook die sekerheid kry dat hulle op grond van hulle meriete bevorder sal word.
  6. Dat ʼn klimaat in die staatsdiens geskep word waarin alle Suid-Afrikaners tuis sal voel.
  7. Dat regstellende aksie in noodsaaklike dienste in sy geheel afgeskaf word.
  8. Dat die vaardigheidsgapings wat ontstaan het as gevolg van die oordrewe rasbenadering met goeie ontwikkelingsprogramme gevul word.
  9. Dat die fokus verskuif van rasse-uitsette na opleidingsinsette.
  10. Dat die staat ter wille van effektiwiteit weer aktief kyk na publieke/private vennootskappe.

Solidariteit het op die oomblik 32 hofsake teen die staat. Die grootste een wat binnekort plaasvind, is die saak namens nege bruin en een wit werknemer teen die departement van korrektiewe dienste. “Solidariteit is ook besig om voor te berei vir ʼn klag by die Verenigde Nasies se komitee vir die uitwissing van alle vorme van rassediskriminasie,” het Hermann bygevoeg. “Indien die staatsdienskommissie ʼn aanbeveling maak dat regstellende aksie opgeskort word, kan dit die voorwaarde begin skep vir Solidariteit en die Staat om ʼn groot skikking oor regstellende aksie in die staatsdiens te onderhandel. Intussen gaan Solidariteit voluit voort met sy regsaksies.”

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

16 Kommentare

jongste oudste gewildste
Elizabeth

Sê en doen is twee dinge. Laat ons sien of dit GEDOEN gaan word of net GESê word….

Elza

Ek werk al 10 jaar vir die staatsdiens maar is nog altyd oor die hoof gesien as ek aansoek doen om verder te studeer. Iets wat beloof is toe ek aangstel is en ‘n kurses wat ‘n voorvereisde vir my posisie is. Dis nie lekker om al blanke te wees by die werk nie. Jy is nooit regtig deel van alles nie en baie gesprekke work gevoer in ‘n taal wat ek glad nie verstaan nie.

Gerhard Bezuidenhout

Vir hoe lank gaan die blanke n pos beklee voordat Regstellende Aksie weer toegepas word .Ons weet mos teen die tyd dat die ANC van niks hou van dit wat werk nie.

Patat

Pragtige slaaptydstorie. Ek gaan dit vanaand vir my kinders voorlees. Is hoeka al deur die jongste feëverhaal wat ek vir hulle gekoop het. :-)

Ansie

Die blankes wat nog in die staatsdiens is leef SWAAR by hul werk (my man is ‘n staats ampetenaar) en glo my, sy sogenamde SENIOR kan nie eens ‘n log boek laat balanseer van ‘n staatsvoertuig nie. Die ander kan laat kom, gee oprobleem nie, laat my man 5 min laat opdaag vir werk, en dit het al gebeur, word hy departementeel aangekla. Die hele berig is ‘n grap. Iemand droom oor iets wats nooit ooit weer sal werk nie. Die staatsdiens EN die land is in sy ……….. In.