Stappe geneem teen DA-LP oor PW Botha-inskrywing

Dianne Kohler-Barnard.

Dianne Kohler-Barnard, senior DA-LP, sal voor die party se federale regskommissie verskyn nadat sy ʼn inskrywing op Facebook gedeel het waarin oudpres. PW Botha, aangeprys word.

Phumzile van Damme, die Demokratiese Alliansie (DA) se nasionale woordvoerder, het gesê Kohler-Barnard se inskrywing is “onverdedigbaar en heeltemal teenstrydig met die DA se waardes van vryheid, regverdigheid en geleenthede”. Mmusi Maimane, DA partyleier, het bevestig dat die saak deur ʼn interne tugproses hanteer sal word.

Kohler-Barnard, die DA se skaduminister van polisie, het twee weke gelede ʼn inskrywing van Paul Kirk, ʼn joernalis, gedeel waarin hy kommentaar lewer oor die skorsing van die KwaZulu-Natalse hoof van die Valke, Johan Booysen. Kirk het onder meer geskryf: “Hierdie is ʼn blêddie sirkus. Kom asseblief terug PW Botha. Jy was by verre eerliker as enige van hierdie ANC skurke.”

Kohler-Barnard se verskoning op Twitter.

Kohler-Barnard het die inskrywing op haar Facebook-blad gedeel, maar dit glo ure later verwyder. Die inskrywing het Donderdag egter woedende reaksie uit talle oorde ontlok nadat iemand ʼn skermskoot daarvan op Twitter gedeel het.

Van Damme het gesê PW Botha was ʼn tiran onder wie se bewind duisende Suid-Afrikaners gemartel en vermoor is. “Dit is waarom ons voorgangers, insluitend Helen Suzman en Helen Zille, geveg het teen die bose stelsel van apartheid.”

Kohler-Barnard het Donderdag op Twitter om verskoning gevra: “Ek vra onvoorwaardelik om verskoning dat ek ʼn inskrywing op Facebook gedeel het waarin die skrywer PW Botha geprys het. Ek het dit dadelik uitgevee toe ek dit besef het.”