Steeds geen teken van ontvoerde sakeman

Shyam Premjee. (Foto: Verskaf)

Daar was teen laat Vrydagaand steeds geen teken van die sakeman Shyam Premjee (36) wat gisteroggend in Louis Trichardt verdwyn het nie. Premjee is na bewering ontvoer.

Brig. Motlafelo Mojapelo, polisiewoordvoerder, sê ʼn groot soektog na Premjee is steeds onderweg.

Sy voertuig is gister reeds verlate op die Meulbos-grondpad gekry.

Maroela Media het vroeër berig Premjee het pas in sy Mercedes-Benz GLC 250 vertrek toe twee voertuie hom glo by ʼn stopstraat voorgekeer het. Een van die voertuie het hom van voor gestop en die ander een van agter, het Mojapelo gesê.

Verskeie skote is glo geskiet.

Volgens die polisie het die verdagtes glo ʼn grys Hyundai Accent en nog ʼn silwerkleurige sedan, waarvan die fabrikaat nie verskaf is nie, tydens die voorval gebruik. Hulle het daarna vermoedelik in ʼn noordelike rigting op die N1 na die Nzhelele-pad, gery.

Enigiemand met inligting oor die voorval word gevra om kol. Nyelisani Mabatha so gou moontlik by 082 565 8171 te bel.

Premjee se voertuig is verlate aangetref. (Foto: SA Polisie)

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.