Steve Hofmeyr oor Covid-19: ‘Dis ʼn woelige siekte dié’

Steve Hofmeyr. (Foto: Joanne Olivier Photography)

Steve Hofmeyr het Maandagoggend gesê hy lees die “duisende boodskappies” wat aanhangers vir hom stuur sedert hy die nuus dat hy deur Covid-19 platgetrek is, op sosiale media bekend gemaak het.

Die sanger het Vrydag op Facebook gesê hy het positief vir die koronavirus getoets. “Ek voel goed. Afgesien van ʼn nare bors het ek geen simptome nie. Dankie vir soveel raad en goeie ondersteuning. Dis die gebede wat ek aanvoel, want daar is engele om ons,” het hy toe geskryf.

Hofmeyr het vandag (16 Augustus) ʼn foto-collage op Facebook gedeel waarby hy geskryf het: “Die wêreld van agter my suurstofmasker”.

In die foto verskyn twee klein hondjies, ʼn selfoon, ʼn boek en sy vierjarige dogtertjie, Romy-Lee.

Hofmeyr het ook gesê hy “skryf, so bietjie bewerig,” en het sy vrou, Janine, bedank vir haar bystand te midde sy gesondheidstryd.

“My vrou, stil, onselfsugtig en sonder voorwaardes, is ʼn ER eenheid op haar eie. Sy is self siek maar is ten alle ure op diens om na my om te sien. Dankie my liefling [sic],” het Hofmeyr geskryf.

“Ek’s op elke doepa drinkbaar. Maar lyk my dis ʼn genadesaak. Binne 48 uur was ek plat, swak suurstoftellings, kouekoors, hoë temperature, nierpyn, duiseligheid, hoes.

Steve Hofmeyr het dié foto-collage op Facebook gedeel.

“Saterdagaand het ek liters water oor my bed uitgegooi en daarin gaan lê net om my temperatuur onder 38 °C te kry. Dis ʼn woelige siekte dié. Ek ken dit nie,” het hy bygevoeg.

“Gisteraand was beter. Dankie. Ek lees alles. Niks genees soos die duisende boodskappies nie.”

Hofmeyr het vroeër vandeesmaand geskryf dat hy “ná maande lange werkloosheid” weer op ʼn verhoog kan stap en ʼn “liedjie kan waag”.

“Dít is die langste wat ek nog nié gesing het nie. Ek’s skoon skrikkerig.”

Die kunstebedryf is een van die sektore wat weens die inperkingsregulasies, veral die verbod op byeenkomste, lamgelê is.

Talle van Hofmeyr se ondersteuners het in kommentaar op die gewilde sanger en aktivis se inskrywing hul eie ervarings van Covid-19 gedeel en Hofmeyr raad gegee oor hoe om dit te hanteer.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

24 Kommentare

jongste oudste gewildste
Misky

Sterkte Steve. Ek glo en vertrou op onse Vader en dat hy jou spoedig sal genees.

Mariaan

Was jy al inge-ent Steve? Sal interessant wees om te weet…sterkte vir jou!

marius

Gebed . Dis al .

Aai

Vat dit maar rustig Steve hy raak gewoontlik baie erger vanaf dag 6 so rus maar jou liggaam so dat jy hom kan baklei as hy erger raak.Sterkte daar en gou gesond word.

Elsabe

Baie sterkte, Steve. Ek bid vir jou. Xxx