Swaar straf vir Tarkastad-plaasmoordenaars

Argieffoto

Argieffoto

Aletta “Lettie” Rupping (86), ʼn boer van Tarkastad in die Oos-Kaap, se drie moordenaars is Vrydag, byna ʼn jaar ná haar moord, swaar in die Grahamstad-hooggeregshof gevonnis.

Rupping, wat alleen op haar plaas Rietpoort gewoon het, is Sondagoggend 23 Maart verlede jaar ná ʼn kerkdiens in die dorp vermoor.

Maroela Media het vroeër berig haar liggaam is die volgende dag in Whittlesea naby die pad tussen Mbekweni en Oxton aangetref. Sy het verskeie skietwonde opgedoen en daar was patroondoppies langs haar liggaam. Haar gesteelde voertuig is later in Cradock opgespoor.

Ian Cameron, AfriForum se hoof van gemeenskapsveiligheid, het destyds aan Maroela Media gesê Rupping is die Sondag omstreeks 12:00 ontvoer.

“Die verdagtes het haar na Queenstown geneem en omstreeks 00:00 kontant uit haar rekening getrek,” het Cameron gesê. Rupping het vermoedelik toe nog geleef sodat hulle haar PIN-kode kon bekom. “Hulle het haar op pad terug na Tarkastad doodgeskiet.”

Die drie verdagtes, twee mans en ʼn vrou, is dieselfde dag waarop Rupping se liggaam gevind is, in hegtenis geneem. Haar persoonlike besittings, insluitend ʼn vuurwapen en debietkaarte, was in hul besit.

Kapt. Stefanie Smith, polisiewoordvoerder, het Dinsdag in ʼn verklaring gesê die twee mans, Xolani Frans (44) en Ayanda Frans (33), is tot lewenslange tronkstraf gevonnis vir haar moord. Hulle is ʼn bykomende 15 jaar vir gewapende roof, tien jaar vir ontvoering en vyf jaar vir die besit van wapens en ammunisie gevonnis.

Die vrou, Thandiwe Kondile (29), is lewenslank gevonnis vir Rupping se moord, asook 15 jaar vir gewapende roof en tien jaar vir ontvoering.

Lt.genl. Celiwe Binta, provinsiale polisiekommissaris, het die swaar vonnis verwelkom. “Die vonnisoplegging moet ʼn sterk boodskap aan toekomstige oortreders stuur dat die polisie geen steen onaangeroer sal laat om misdaad en kriminele aktiwiteite in die provinsie te beveg nie,” het Binta gesê.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

15 Kommentare

jongste oudste gewildste
anet

Mooi, dat hulle lewenslank sit. Moordenaars !! Ons verwelkom so ‘n swaar vonnis, en ek hoop dit stuur ‘n boodskap aan die ander skelms en moordenaars in Suid-Afrika

Elize

Anet, ek glo nie lewenslange tronkstraf skrik enige moordenaar/misdadiger af nie. Sulke mense is klaar so gebrein damage (net om so n daad te pleeg getuig daarvan). Die tronke is reeds so vol wat ONS die belastingbetaler vir hom sorg, dat hy beplan al af dag 1 af in die tronk, of sy volgende misdaad, ontsnapping ens. Wens net die regering wil doodstraf terugbring, dis al wat dalk n invloed sal he.

sproetjies

Lewenslange tronkstraf perk nou wel jou bewegings in, maar dit skrik niemand meer af nie. Dit verseker net ‘n lekker lewe waar jy elke dag kos, slaapplek en klere het wat deur die belastingbetaler voorsien word. Die doodstraf boesem vrees in en sal ‘n misdadiger 2x laat dink voorhy/sy ‘n misdaad pleeg. Ons regering faal ons landsburgers liederlik. Dis ‘n skande.

snip

Wanneer bou hulle nuwe tronke, die bestaandes bars seker al uit hul nate uit?
Dis vreeslik om te dink sy word n hoë ouderdom van 86 om dan vermoor te word. Wat het hulle nou gekry om die arme tannie wat hulpeloos is te vermoor. Ja wat, ons het mos net tronkstraf in die land, so dan moet mens dankbaar wees hulle sit lewenslank, maar die vraag is…..gaan hulle nie nou weer vroëer uitkom oor een of ander onverklaarbare rede nie?

scalla

Hang die gemors….