Terreurklag teen Malema

(Foto: EFF/Twitter)

Die landbouorganisasie TLU SA het aanklagte van terreur teen die EFF-leier Julius Malema aanhangig gemaak.

Die aanklagte kom na die uitgesproke leier se opmerkings die afgelope naweek by ʼn byeenkoms in die Vrystaat waar hy gesê het polisielede en hul gesinne sal in huise geteiken word.

Verskeie ander organisasies het reeds aanklagte teen Malema aanhangig gemaak, terwyl die minister van polisie, Bheki Cele, die uitsprake ten sterkste veroordeel het.

Die vakbond Popcru het ook teen die opmerkings uitgevaar.

Henry Geldenhuys, president van TLU SA, het Donderdag in Sheepmoor, Mpumalanga, die klag van terrorisme en ondermyning aanhangig gemaak.

“Dit is totaal onaanvaarbaar dat enige persoon blatant en in die openbaar ʼn aanslag teen die polisie en sy lede loods,” het Geldenhuys gesê.

“Die polisie verteenwoordig die gesag in ons land en sodanige aanslag moet dus in die ernstigste moontlike lig gesien word. Die feit dat hy ook ʼn sittende lid van die parlement is, behoort verswarend teen hom te tel.

“Die staat behoort alle regsmiddele tot sy beskikking in werking te stel om korte mette te maak van hierdie soort gedrag en uitsprake.”

Geldenhuys sê dit is onmoontlik om stabiliteit in die land te bou as gedrag soos dié van Malema net met ʼn verklaring veroordeel word. Hy sê dit is onvoldoende en dat Malema hom nou al herhaaldelik bewys het as iemand wat wet en orde en verhoudinge tussen mense destabiliseer.

“Dit is vir ons as landbouers onaanvaarbaar dat ongegronde stellings soos hierdie gemaak word. Dit is kommerwekkend dat ʼn klimaat geskep word waarin verskille met fisieke geweld besleg kan word. Mnr. Malema en sy trawante se uitsprake dra gewis by tot die geweldskultuur wat Suid-Afrika teister en elke wetsgehoorsame burger se toekoms steel.

“Die regering moet in sy optrede teen mnr. Malema wys of hy regtig die land regeer en of hy maar eintlik – soos baie keer beweer word – net pionne in die EFF se spel is.”

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

61 Kommentare

jongste oudste gewildste
Androclus

Van mal-emma moet ‘n voorbeeld gemaak word.

Werner

Mooi Henry ons hoop daar kom iets van

Joggie

Malema is die ANC se nie-amptelikke woordvoerder…

Lee

Dit is tyd vir Malema om van die prentjie te verdwyn, hy is n doring in SA se voet.

H

is die terroris al gearresteer ???????