Foto’s: Toestand van Potch-landboukollege skok

(Foto: Annelise Lange Photography)

Die organisasie Saai het ʼn brief aan die bestuur van die Potchefstroomse Landboukollege, bekend as Pampoenboere, gerig waarin hy sy kommer oor die haglike toestande van die infrastruktuur by dié kollege uitlig.

Foto’s en verslae van diere wat vermaer is vanweë swak en verkeerde voeding, haglike krale en weidings waar rommel gestort word en dierewelsynpraktyke wat die Dierebeskermingvereniging na sy asem sal laat snak, staaf die organisasie se klagtes.

Die organisasie eis in die brief dringende optrede van die bestuur om die kollege tot sy vorige funksionering en toestand te herstel.

Francois Rossouw, uitvoerende hoof van Saai, sê afhangende wat die kollege se repliek is, sal die organisasie daarvolgens stappe doen.

Die brief volg nadat verskeie personeellede en studente aan dié kollege Saai gekontak het rondom die agteruitgang van die kollege.

Die kollege word as ʼn erfenisterrein beskou wat ’n deurslaggewende rol in landbounavorsing en -opleiding speel. Van die geboue het historiese betekenis en word as historiese monument beskou, soos die Selbourne Hall en Administrasiegebou.

Maroela Media het vroeër berig Pampoenboere is in 2003 deur wyle minister Edna Molewa as die grootste navorsing- en opleidingsentrum vir landbou op die vasteland beskryf.

Saai lig in die brief die volgende kwessies uit wat onder sy aandag gebring is. Al hierdie kwessies word met foto’s in die brief gestaaf:

• Die geboue van die kollege is vervalle en val uitmekaar omdat dit nie in stand gehou word nie. Weens die verval is daar ʼn groot moontlikheid van verdere strukturele skade wat deur reën of wind aangerig kan word.
• Daar is verskeie waterlekkasies van krane, toilette en wasbakke, wat tot verdere skade kan lei en water wat vermors word.
• Die geboue, sypaadjies en strukture is oorgroei met onkruid.
• Die perseel is met rommel besaai.
• Van die vee en diere is ernstig ondervoed en onversorg. Hulle leef ook in vuil toestande.
• Die skape word verkeerdelik hoendervoer gevoer en nie voldoende versorg nie.
• Verskeie van die melkbeeste het mastitis, wat onbehandeld bly.

Vrae oor die kwessie is in die brief gestel en die bestuur het geleentheid tot 10 Julie op daarop te reageer.

Maroela Media het navraag oor die saak aan die bestuur gerig, maar wag nog vir terugvoer,

Volgens die organisasie het verskeie studente by die kollege en lede van die gemeenskap dit op hulself geneem om die perseel skoon te maak en die plantegroei te onderhou.

Een van die studente aan die kollege het op voorwaarde van anonimiteit aan Maroela Media vertel hoe hy en sy medestudente al self moue opgerol het om die terrein te probeer opknap.

“Ons het al keer op keer dele van die terrein skoongemaak en onkruid uitgehaal, maar daar is ook net soveel wat ons in ons eie hoedanigheid kan doen, aangesien ons nie die regte toerusting of gereedskap het nie,” sê die student.

“Dit is oor die algemeen net sleg om te sien hoe die kollege agteruitgaan.”

Die student ervaar ook dat die gehalte van onderrig agteruitgaan, veral as hulle by vorige studente en dosente hoor hoe goed die onderrig vroeër jare was.

“Die vertaling van Engels na Afrikaans belemmer ons studies, omdat vertaling in aantekeninge en vraestelle nie ordentlik gedoen word nie.”

Hy sê die lesingslokale word wel nog redelik goed in stand gehou, behalwe vir die plafonborde wat inmekaarstort.

Saai meen die kollege en die departement van landbou en landelike ontwikkeling in Noordwes versuim in hul verpligting om die kollege in stand en skoon te hou om ’n funksionele en veilige leeromgewing vir die studente te skep.

“Ons wil weet hoe dit gebeur het en iemand moet aanspreeklik gehou kan word,” sê Rossouw.

Volgens dr. Theo de Jager, uitvoerende voorsitter van Saai, verwag Suider-Afrika van sy tersiêre landbou-opleidingsinstellings om jong boere op die snypunt van internasionale opleiding kompeterendheid te hou. “Daar is mense wat glo dat die foto’s oor vervalle infrastruktuur en vermaerde beeste aangedik is omdat dit so buitengewoon sterk kontrasteer met die uitnemende kollege wat duisende boere en landbousakelui as hulle alma mater onthou, maar ʼn foto kan nie lieg nie” sê hy.